المساعد الشخصي الرقمي

مشاهدة النسخة كاملة : محمد الحسن حسن سالم (حميد)



احمد الاحمدي
01-28-2012, 05:04 PM
ملك اغني المرحم يس عبدالعظيم

احمد الاحمدي
01-28-2012, 05:08 PM
مرثيـة الراحـل يس عبد العظيم

حُزُنّا عليك بيبقى غضب
غضب مشروع
تدودي حمامة في دبش الغنا الفاسد
مناحاتو
ضَرَاعاتُو التّضاضِي تئن
عشان قلب الحبيبة يَحِنْ
أجل، لا حنّ لا كانت حبيبة آ خوي
ولا لما الحبيب إن كان
مسبّب عبرتو وراجيكا يا خايب الغناوي البيش
تنوح وينوح..
ويسقط حُبْ إذا ما حُولَقْ الرقراق عليهو يموع
ويسقط لحنك الرّاكد ..
كمنجاتك
سلوك طمبورك المرخية
يا مزوِّر جواز العشق يا ذاك المغني الياهو
يا مُنْدَشْ وكِت فتق القوافي الجوع
تسقط غنوتك تسقط..
وأقيف شاهد عليك وعلي
أنا البشّرت لحظة طيش
والبت الأبت ترقص، تعيش واسقط..
أيا هادي المُغني الفنجري المعلوم
نخيب نسقط إذا قصّرنا يا وتر الفقارى وراك
وغيّرنا الغنا المحموم.
غناك الدّغري
يا دغريتك المبثوثة شِقّيشْ ما مشيت باراك
غناك العينو ملياني
وشيهو محل يروح واحد
سمح مشروح
وإنت محل تروح واحد، وِشَيْ مطروح..
سلام في سلام
تمام في تمام..
تمام فلاح.. تمام عامل
تمام إنسان وماك ساهل
متِلْ ما شعاع نزل داخل، بيوت ناساً غبش بالهم،
ملاها ثبات وراح راحل،
جناح الحِن ويوم الليلي بات مجروح
أيا فارساً يا مجهول، وراك كيفِنْ؟
سَمِحْ. كيفن غنيواتنا؟
إذا مرقت براها بلاك، منو اليسرح معاها بلاك..؟
تصل لي مِيسه زي الغيم. تَضُل ما تضِل
واللا براها يتلقاها دابي الجو ..
هجاير الليل ..
طشاشات الصعيد. وسموم تسوي الهوْ..
تجفل غادي.. تجفل جاي..
تقع لا حيلة بين بلدين
بلد جملة غُنا الطمبارة
بلد بي جاي: نشيد ياسين.
نشيدك كالتعب مارد
مهبهب بالغضب واقد
غضب يا وليد، حُزُنّا عليك، تغيب يطلع بدل فاقد..
أيا ولداً حزُنّا عليك يقولّك: عَمِّرْ الطمبور..
وسِنْ سِلْكَاتُو بين نغمين
وجُزْ رقبةْ غناوي الزِّيف ..
ونَشِّن تالا ليل الرِّيف:
ظلاماتو..
عذاب أهلو..
معاناتم محل رحلو..
وأمش ما تقيف .. أمش ما تقيف..
فيا "عفّاضي" ديل فِقَرَاً عمار بيتم خراب بيتنا
فيا طمباري يا ود الدِّويحية الغبش جاهد
أيا ولداً مستّف بي تَرَا العفّاض .. ملفّح بي سماواتو
معمَّر بي غد الأطفال .. مدرَّع بي معاناتو
هيا انسِف قبرك الكاذب
وخُط بالدّم علي الشاهد:
تموت يا هادم الغنوات .. تطق بالهكمة والدّكمة
يبق في محلتك إنسان
يشر ضو الحياة الواعد
نشيد راعد
كما الياسين..

نشيد:
تَفْضَلْ غُنْوَاتَكْ ضُل قيلَةْ
ضد شمس الفجعة القلاية
ترتاح أو تاخد أنفاسه الناس الجاية من الورشة .. التُرَب .. السوق .. الطّاحونة
الجّامع وطرف الانداية..
فزعوك الفُقَرَا أياديهم
تالاها امتديت كارديق.
إنطرحت أصابعيك رابون ..
طالت آهاتك بنبون
يا سَكْرَة وحضْرَة ومُصلاية
من لاقيناك عرفناكْ .. تربال أيامنا وغنّاية
طلّاع النخل الكَدْرُومِي
الضام على قلبو قضيتنا
كالأرض كما الجرح اليومي
ضافرين رامْلِنْبُو هويّتنا
**
مشهد حواري سمج:
- الغنوة دي ظاهرة سياسية، وحا تودي رقبتك في داهية..
ولو مرّت بكرة البرنامج
في ناحية وكلّنا في ناحية..
- طيِّب والتاني؟
- أقول ليك:
أمسك طمبورك ده عليك..
غن في القعدات .. في الرحلات .. في الحفلات المختصرة
غن...
وغنّيت في كل الساحات..
بالنّفَس الحار الإنساني
برّدت حشا أولاد الفقرا ..
رقّصت بناتا السّمحات
أبشِر يا باشِر من تاني ..
عُقُبْ رجَّعتَ الرّايحات
يااا الله عليك يا ياسين .. أقْفُر خُطا غيمتاً ما جات
**
فاض نهر قضيتك فاض فاض
ضد سِكّةْ عرق الإجهاض
مركب شهدانا الجايين .. هدّن بنا قَبَلْ "العَفَّاض"
نلقاك يا قاعد تنوضا .. فوق قيف الغُبُشْ الفيَّاضْ
يا واقف حيلك وتِنْقَضّ .. على آفةْ الزّمن الرَّضْرَاض
ويا إمّا رَتُوتيكْ والعرضة .. وقدّامك عرب العفّاض
الزّحف الصحراوي.. الأرضة ... المرض.. الهدّام العاضّْ
تاريخ الجُزُر المنقرضة ..الفقر الهتك الأعراض
عينيك تطشِّشْ منقبضة .. العالم ينشرَّ بياضْ
تتلفّحُو خالي من الفوضى .. والعسكر وكل الأمراض
زي زيَّكْ زيّك ماب نرضى .. الموت يا عريس العفّاضْ
يا مقدّم باطفال الرّوضة .. شُويِمْ يا عريس العفّاض
يا سِبْحَةْ أُسُرْ الطمبارة
والأيدي الشّهرت جيتارا
للآخر نازفة محاجرنا
بالغضب الدينو دفاترنا
والطبقة وأمي وجيفارا
قُمنَا وشدّينا حناجرنا
ما بينك وبين "فكتور خارا

احمد الاحمدي
01-28-2012, 05:10 PM
ياغيم بلا كلفه

يا غيم بلا كلفة
أدَّ الوطن بُلاّل
ناساً فرِِد وقفة
أبقالُن الضُلاّل
..
خدِّر حراز جفَّ
رجعلو طيراً ضال
قلباً وراك خفَّ
ما دار بلاك تقّال
..
غنيت من المنفى
للحلم والأطفال
موّالي ما كفَّى
يا غيم أرِم موّال
..
يا غيم بلال في الضيق
وكم من بلال لا زال
ما صادفو الصدِّيق
مجرور على الرمّال
..
من نتقة الكانديك
ماسك في أحَد تقّال
في الكير دبارتو عليك
وما أصعب الشلال
...
غرقان وريقو دقيق
يا غيم تعال وتعال
من فوق وتحتو حريق
وبعض الصبر هقّال
ما يطفي هادي النار
ما يشفي إلاّ النار
نار المطر يا نار
تار النبيين حار
...
يا نسمة يكفي سفر
يا رحمة صدّي الدار
في كل زول في مطر
وياما إحنا يمة كتار
...
يانا العربنا النيل
من جملة الأنهار
وكالنيل نفسنا طويل
وزي موجو .. وين ننهار !؟
...
يا هاجر التسعى
بين الوطن والبال
السبعة فوق سبعة
قمراً سمح مو هلال
...
وتحت القمر رجّال
عمرت بها الحلاّل
بتوعِّي في الأجيال
إنو الحِلم مو خيال
...
عودني جرحي أوعى
ما السخرة والرأسمال
ما الطيبي والروعة
والصيبي في العمّال
...
من دمعة لي دمعة
شافع غناي رحال
قادر على اللوعة
وصابر على الآمال
..
يا أم عطشةّ إسماعيل
يا أم رعشةّ الأطفال
ترفس فكان النيل
وكان العشم والفأل
...
باب الفجر بفتح
فتح النَفِس موّال
فتح اللبق في الصيف
تالا الشتل تربال
...
باب الفجر بفتح
لا ضيق ولا إستعجال
والظلمة تترايم
عند دقة الرجّال
...
هز الفجر يا خي
وأم ضي رمت شبّال
عرض البلد صي صيْ
وشويمت يا البلال
...
خشّيت على حلة
لاقيت شعاعاً ضال
من ضو صباح الله
ضارب لو في رحّال
...
قاعدلو فوق بنبر
يتمطق الأطلال
ماسك حمام أخضر
يسقيهو في موال
...
حين عشرق السكر
يمة الحمام شِن قال
قُصّر أم القيصر
يسكر بدم أطفال
...
طار الحمام
في الحال
الزيفة بوخه لوى
من قبلي برقاً شال
جاب البشارة هوا
...
دلّو الليالي تقال
وطلق المطيرة خوى
جوانا بتّق طال
عشماً عويدو قِوى
...
وغنّا الشعاع الطال
غنينا طلنا سوى
شال النغم عتّال
بايتين عيالو قوى
...
باكرنا سترة حال
باكر رغيف وروى
باكرنا بقة فأل
باكر كتاب ودوا
...
باكرنا للأجيال
ينشرّا نور وهوى
لا تلاقي فيهو وبال
لا هم بعاد لا جوى

منذ أكثر من سنة
وملعون ابو الفرقه
ملعون ابو الدولار
ياغيم بلاكلفه

احمد الاحمدي
01-29-2012, 10:29 AM
آه يا غبش
ما عندي ليكم غير نغيم .. برجوه ينفض لي غبار زمن القسا .. الكتاحة
يهد عرجون نخل صبر الغلابة الطال ..
يحت يخرت .. تباريح الأسى الممدودة فوق نور الدغش
يا نورة آه ..
يحرد كنائسنا المسيح .. يعرش مدارسنا الصدى
ييبس يباس حلق العصافير الوديعة من البكا
إندردر الصوت البعيد أسيان تصر من دون صدى
ينكفرن الفجر الصبوح .. يحمي الزهيرات الندى
تختا الدراويش الضريح .. يسكن خلاوينا الجنون
يهجر جوامعنا الإله
يا نورة آه
تطرح غيوم الشوق تئن .. تشرق تموت خيل كلمة الحق التناهد في الشفاه
يعقر بسيمة الصح مع لوبي الجروف
تغرز ضريعات الحروف
ينشف مراح الأمسيات .. تتمطق الأرض المروق والأغنيات
اللي الشروق .. والأرض والحب والمطر
تضهب تتوه .. وكتين يضيع عرق الجباه الشم .. شمار في مرقة
آه يا نورة آه
من دربك التور نفس خيل الصبر .. فتر خطاوي الشوق وراه
يا نورة آه
ساعة الشموس الغر .. تهضلم تلحق الصح في المغارب
تدفر الضو الكهارب
وفي وشيك تدفر المدن الضبابية السرابية الكآبة
وحائط التيه والطشاشات فوق قفيك
يا أم عوارض .. مو دعاشة .. ماها شبورة وتقيف
جاي ليك يا نورة غيمة .. تملا ماعونك خريف
يملأ عينيك ويفضل .. يروي جواك العطاشة
مو دعاشة
يا مطر عز الحريق
يا مصابيح الطريق
يا المراكبية البتجبد من فك الموج الغريق
يا الجزاير النتحويبا .. لما إنشعوز بحرنا
يا المراسي النتحويبا .. لما إنشعوز بحرنا
يا نشوق روحنا ودمرنا
يا المحطات الحنينة القصرت مشوار سفرنا
يا ما شايلك بين حايم
أيوة شايلك بين حائم
في الأرض تكون قضية .. في السما الاحمر غمايم
بي برد نغما السلامي .. رطبت حلق الحمائم
طنبر النخل التبلدي .. راقص الأبنوس وصفق
لعبت الصقرية موجة
خلت النيل هاجلو هوجة
بشرت بالخير بلدنا .. شالت الشبال نسائم
جددت زلفي القديم .. أمشي بالماشيبو أقاوم
لا بتكبر راسي فورة .. لا بتصغرني الهزائم
جنس يا نورة ابن آدم حلمو في عالم مسالم
لا الليالي الماها ليا .. لا الشماتات العليّ
لا البنوك المخملية
لا تفاهات الحضارة ..
لا عفاريت المدينة .. لا العمارات السوامق .. فوق ضهر ناساً فقارى
لا الهتاف الفاوة ضارى
غطى بالي من الفوارق .. لا الألوف الطمطمية
لا البرندات الوسيمة .. ولا الأسامي الأجنبية
بتمحى من عيني ملامحك .. وإنتي جاية المغربية
جاي دايخي المغربية ..
وشك المقبول مكندك .. سامسونايتك زمزية
كونشبر .. مرزبة مقطع
ريشة فانوساً مدردح
قلت بيهن لي زمانك .. يا زمان الحجة عندك
يا زمان الآفة حدك .. لا تطا الوردة الصبية
يا نفس فجر القصائد .. يا بلادي
القطع قلب الروادي
باللواج الجاي وغادي
ده ما هو صوتك .. لاها صورتك
دي بترقش ناديي فوق صدر الجرائد .. ماها صورتك
لا هو صوتك .. لاها صورتك
إنتي يا الفي إطن الصحارى
شفع العرب الفتارى
البفنو الشايلا إيدن .. ويجرو كابسين القطارة
يجرو باريين القطارة
لا سراب الصحراء موية .. لا حجار سلوم موائد
إنتي في الغابة اليصارع .. جوفو للآهات تلكي
يا مدفق غيم رجاهو .. لكن الأيام كركي
في خلا حالنا اليمحن .. ويملأ بالسهد الوسائد
إنتي غيمة .. شديرة .. خيمة .. إنتي جاهنا ..
والتقا الطلقت وشينا .. فرقت غمة جباهنا
فرجت في الحارة ضيقنا
فرحت شفع فريقنا
والمواعيد الحزينة .. وإتجاهنا
يا النغيم البقّ فينا .. وشدّ لي وتر إنتباهنا
يا تباشير يا بشارة
إنتي يا ضرعاً تكرمش .. شان يرضعني الجسارة
إنتي في منفاي رفيقة .. وفي حشا الأشواق حرارة
يا هدى الناس الحيارى
يا ندى الفجر اليبلل صور عوينات الفقارى
جاي ليك .. آه جاي ليك .. يا نورة آفة
آفة للسوس الجا ينقر .. عود عشيماً داخرو فيك
وأصلي لمن أدور أجيك .. لا بتعجزني المسافة
لا بقيف بيناتنا عارض .. لا الظروف تمسك في إيدي
ولا من الأيام مخافة
يا نفس فجر القصائد .. ما ضهب في بعدي عنك
واصلي متغرب عشانك .. راضي بالبيجيني منك
ما بكيت شح الليالي
لا شكيت نُح .. شلتو حالي
رغم إنو الحال بيفسخ .. إلا كُت في الحارة بنده
يا وطن عز الشدائد

احمد الاحمدي
01-29-2012, 10:31 AM
نـادوس


ايوة بحبك حباً جمة
وياما بعزك يا نادوس
ساقات حنك فيهن منك
ومني المشق والقادوس
يا ترقوة الحلم الواحد
من شرا ريح الزمن السوس
ايوة بحبك حباً جمة
وياما بعزك يا نادوس
احبك وانتي ماساتي
في زولا حب ماساتو
بحبك صاح
احبك يا ندى الاصباح
يا بهجة صدى الافصاح
شايلك وفكرو شقبش راح
عيونك ياها ناساتو
احبك وانتي ماساتي
في زولا حب ماساتو
بحبك من زمن مو اسع
واحبك لزمن لسع
يا عشم البدو النجع
قاصدك ومستحيل يرجع
قلب تالاكي خطواتو
احبك وانتي ماساتي
في زولا حب ماساتو
صحيح يا دفة التاريخ
فقدتك وروحي مشتاقة
فقدتك الا ما نهنه
ولا قلت دنيا فراقا
لاني على يقين أنك
حترجعي في حنتلاقي
حنتلاقى وشديرة الالفة زي اول
تدنقر فوقنا باشواقا
خطاوينا الزمن صنت
يعربد تانى ساساقا
ليالي الحن تطول تغزر
وراك ما باتت افراقا
حنتلاقي وهجيرة الغيبة من فوقنا
تبارى الشوفه رقراقا
الاقيك انا الطولت راجيك
انورق في الزمن ضايق
متين يكمل والاقيك
انا البستنى جية الليل
عشان انجع مناجيك
واصن جنب نجمة راجيك
حزين لكني مطامن
مشارط للزمن فيك
مغالط وحاشا ما خنتي
ولا هنتي وبلاك انتي مباديك
اعيش ساكت واموت ساكت
حروفاً لي عيوناتن تدوخ الدهشة بيناتن
وسط لجة عيون الكل
عيونك زي عصا موسى
بريدك يا شديراتن
تقوم فجراوى مريوقة
تقطع للهجير فوقا
عشان تدي التعابة الضل
احبك وانتي ماساتي
في زولا حب ماساتو

احمد الاحمدي
01-29-2012, 10:33 AM
يا مطر عِزْ الحريقْ

يا مصابيح الطّريقْ
يا المراكبية البتجبِدْ
من فَكْ الموج الغريق
يا الجزاير النتحويبا ..
لما إنشعوز بحرنا
جينا ليك والشوق دفرنا
يا المراسي النتحويبا ..
لما إنشعوز بحرنا
يا نشوغ روحنا ودمرنا
يا المحطات الحنينة ...
القصّرَت مشوار سفرنا
يا ما شايلك بيني حايمْ
أيوة شايلك .. بيني حايمْ
في الأرِضْ تكوين قضيّة .. !!!
في السّمَا الأحمر .. غمايمْ
بي برِدْ نغما السّلامِي ..
رَطّبَتْ حلق الحمائمْ
طنبر النّخل التبلدي ..
راقص الأبنوس وصَفّقْ
سَوّتْ الصقرية موجة
خَلّت النِّيل هاجلو هوجة
بشّرت بالخير بلدنا ..
شالت الشّبَال نسائمْ
جدّدَتْ زلفي القديم ..
أمشي بي الماشيبو أقاوم
لا بتكَبِّر راسي فورة ..
لا بتصغِّرني الهزائمْ
جِنْس يا نورا ابن آدم
حلمو في عالم مسالِمْ
لا اللّيالي الماها ليّا ..
لا الشّمَاتات العليّ
لا البنوك المخملية
لا تفاهات الحضارة ..
لا عفاريت المدينة ..
لا العمارات السّوامِق ..
فوق ضَهَر ناساً فقارى
لا الهتاف الفاوة ضارى
غطى بالي من الفوارق ..
لا الألوهة الطوطمية
لا البرندات الوسيمة ..
ولا الأسامي الأجنبية
بتمحى من عيني ملامحِكْ ..
وإنتي جاية المغربية
جايي دايخي المغربية ..
وشِّك المقبول مكَنْدَكْ ..
سامسونايتك زمزمية
كونشبر ..
مرزبة
مقطع
ريشة فانوساً مدَرْدَحْ
قلت بيهن لي زمانك ..
يا زمان الحاجة عندكْ
يا زمان الآفة حدّكْ ..
لا تطا الوردة الصبية
يا نفس فجر القصائد .. يا بلادي
القَطَع قلب الرّوادي
باللُّواج الجاي وغادي
ده ما هو صوتِكْ .. لاها صورتِكْ
دي البترقش
ناديي فوق صدر الجرائد ..
ماها صورتك !!!!
لا هو صوتك ..
لاها صورتك !!!
إنتي يا الفي إطْن الصّحَارَى
شُفّع العرب الفتارى
البَفِنّو الشايلا إيدُنْ ..
ويجرو كابسين القطارة
يجرو باريين القطارة
لا سراب الصّحراء موية ..
لا حُجار سلّوم موائدْ
إنتي في الغابة اليصارِعْ ..
جوفو للآهات تلكِّي
ياما دفّقْ غيم رجاهو ..
لكن الأيام كركِّي
في خلا حالنا اليمحِّن ..
ويملأ بالسُّهد الوسائدْ
إنتي غيمة ..
شديرة ..
خيمة ..
إنتي جاهنا ..
والتّقَا الطّلَقَت وشينا ..
فرّقَت غُمّة جباهنا
فرّجت في الحارّة ضيقنا
فرّحَت شُفّع فريقنا
والمواعين الحزينة ..
وإتجاهنا
يا النغيم البقّ فينا ..
وشدّ لي وتر إنتباهنا
يا تباشير يا بشارة
إنتي يا ضرعاً تَكَرْمَشْ ..
شان يرضِّعني الجسارة
إنتي في منفاي رفيقة ..
وفي حشا الأشواق حرارة
يا هُدَى النّاس الحيارى
يا ندى الفجر اليبلِّلْ
صور عوينات الفقارى
جاي ليك ..
آه جاي ليك ..
يا نورا آفة
آفة للسوس الجا ينقُرْ ..
عود عشيماً داخرو فيكْ
وأصلي لمن أدور أجيك ..
بجيك
لا بتعجِّزْني المسافة
لا بقيف بيناتنا عارِضْ ..
لا الظُّروف تمسك في إيدي
ولا من الأيام مخافة
يا نفس فجر القصائد ..
ما ضِهِبْ في بُعدي عنِّكْ
واصلي متغرِّب عشانك ..
راضي بالبيجيني منِّكْ
ما بكيت شُحْ اللّيالي
لا شكيت نُحْ .. شلتو حالي
رغم إنو الحال بيفسَخْ ..
إلا كُت في الحارة بصرخ
يا وطن عِز الشّدائدْ
يا وطن عِز الشّد ائدْ

احمد الاحمدي
01-29-2012, 10:34 AM
خوفي من تلحق رفيقك

حُّمــــــــيد

خوفي من تلحق رفيقك
يا بريق نجم الحيارى
وإنت لا نّور طريقك
لا شرق فجر السهارى
من زمن يا صحوة طلعك
غصة في حلق الصحارى
حتى شال النمة فرعك
دودى زي وهج البشارة
قلنا يا سعد المواسم
عودك المليان جسارة
عودك الفجري المصادم
بالبصيرات والبصارى
مستحيل يرضخ يساوم
مهما كان الريح حصارا
يفضل النخل البقاوم
في السقوط نخل الفقارى
يااندلاع صوت الغفاري
في حلق دغش الغلابا
لو خريفك تاني يطرح
آهـ يا اخر سحابة
لمايا شرف المواكب
يبقى هم الناس إمارة
تندحر كل المناصب
ينكسر كرسي الوزراة
كنتو وين وين إنتو كنتو
كنتو وين
لما الشوارع ما ثبت قداما مرتق
نفضّت صمت المسافة
مّدت الشوق المضارع
للصباحات التجرتق
كف شهيدا البق مارق
من فرقة الظلمة فجرًا
تم بي دموّ الشرافة وضم حضن الارض عاشق
كنتو وين وين انتو كنتو
لما كان في سجنو ثائر
بي جلابة السونكي نومتو
ويصحى بي امر العساكر
قومتو في الزنزانة يمحى
ويفتح الاف الحناجر
ت.. الاطفال ويكتب انبل الاشعار لباكر
تشطب السجان وصوتو ويبقى فنانا البساسق
كنتو وين . وين انتو كنتو
لما فضل الدين عباية
تربي فوق كتف الغنايا
تنتصب في الجو طوابق
تنقلب في التو بنوكة
للبداهن
والبنافق
والبوافق
لما كان نفس العبايا
تتنفخ بي قدرةحبلا
لي قصار عمر الكحايا
من جُنب تنسلا سيفًا
عبّر السواهو سارق
شدة الفقر الخرافي
حدة الشغل اللي مافي
رُغم الاف المتاجر
والخوازيق والمرافق
كنتو وين انتو كتو
لما البيوت في الشمال قامت خنادق
بالكتابات البتنزل فوق ضهاريهم
مطارق
لما طلاب الحقيقة كانو بختارو المشانق
ولما لسة الله بموت في الجنوب
بين البنادق
كنتو وين وين انتو كنتو
آهـ يا وطني المستف
في المطارات القصية
آه يا كفني المنتف
في مدارات القضية
آهـ يا صمتي المكتف في العبارات الندية
آهي يا نفسي الملطف بالنهارات الصبية
آهـٍ من رفع المصاحف بالرماح الاجنبية
المعاطف اجنبية
العواطف اجنبية
الجلاليب اجنبية
الدولايب اجنبية
الدهاليز اجنبية
السراير اجنبية
المساير اجنبية
صبة الكآس اجنبية
ختت الراس اجنبية
رشة الدلكة اجنبية
رعشة الفركة اجنبية
طفية النور اجنبية
والخوازيق
عربية
عربية
عربية
فضي نارك يا محارب
ولا هات البندقية
غني عشقك يا صبية
احنا قدامك مدارك
غني للوطن المفارق
عشت يا وطني المبرق
بالندى ولون المشارق
يامحرق
يامحرّق
يا مجرب
عشت بي شرف البنادق
ويسقط
العفن ال بتلب فوقنا من شُرف الفنادق
يسقط
يسقط

احمد الاحمدي
01-29-2012, 10:36 AM
طوريتك


حتى الفصول صابا الج
لا غيمه لا زفة هرع
والسنبر البفرح صفيره
فافغشانا أتقاطر رجع
وشجرنا من لفح السموم
غصنه الرقص رويان وقع
لا شابا لي ريحه دعاش
لا هش لي برقا" لمع
طوريتك في الطين مرمية
وطوريتك يابسة ومجدوعة
لا غيبتك كانت مرضية
ولا فوتك كانت مبلوعة
اللهب الضوا الليل قناديل
في عيون النجمة القطبية
والتعب المد ضراع النيل
سجادة فقرا مزاورية
سائلين عنك ويومياتي رحيل
لمواني المدن النفطية
وشقيش ما تقبل يا آبو الحيل
قلوبنا مواجعك متكية
وابعت لك شال الحب مرسال
تايهين في بحره مراكبية
وبكتب على صدر الموج آمال
أطفال عمال ومزارعية
كيف حال يا أبوي
كيف حال يا خال
بتمسى بيوتنا الكاكية
حزنانة بتبكى مآل الحال
والزمن الساقكم عيديه

احمد الاحمدي
01-29-2012, 10:38 AM
أنا انيقنت من تالاك


لا آسف ولا محزون
على العمر القضيتو معاك
براي باقي الدرب بمشي
وخطاي تعدم الهدّاي
أكان السكّة حارت بيْ
وأكان كرّت سموم الصيْ
على نسم العشم جوّاي
قوافل صبري ماب تضهب
وأمان حاديها مو الدوباي
خيول قبّال دا ماترّت
ولا فرّت من الحوبات
ولا حرّت
ولا انشدت
ولا صدّت سروجه بلاي
وأعود من دربك الدردار
على شعب اليقان مسنود
وأحرس العرسة من تالاي
وريح شجن الليالي السود
صه .. صه يا الحشا المهرود
وهبِّد غلبك الوقّاد
قبل ما يرقدك هبّود
عشتو معاهو ما هو أجواد
زماني بلاهو يبقى يجود
عيشكن يا قماري عليّ
أنا القطّت تقي دنياي
وعشِّكن أبني بي إيدي
أنا البين الرياح جاي جاي
شرطاً ما تقوقن لي
قوقيي يبهلن عيني
ويوقد في دواخلي أساي
"منو العزَّ الحبيب ما لاك
وقدَّس لي عيونو السود
أكان سوِّيت غناك في عود
كان خدّر ملا ا*****
وكان فوّح عبير وورود
وما كان الزمن طاطا
لا وقع انحزم واقود"
شيشكن يا قميريات
كم من قبلي خاب مسعا
وما شقَّ الجيوب ودعا
علي جور الحبيب بآيات
ولا هتك القلوب ونعا
مزارات القريب بأبيات
ولا نوّح على الراحن
قدر ما ظنَّ في الجايات
مظان الخير وجرحو وِعا
ونظر قدّام مضمِّد سكتو الموجعه
.وكتّر خيرو يا أيام
وكتّر خيرك إنتي معا
ده ما أول صد ولا آخر ود
وكم من صد ودادي رعا
ويا زارع حياتي صدود
عذابي معاك إنّي غمامة
وإنت كركي لا محدود
ونبت البينا كان لابد
يضبلن ما يضبلن كيف
وإنت لقيتو عز الصيف
صهاديب الصعب صالا
نتقت النسمة من تالا
نتفت الغيم خريف وخريف
حبست تسابو تحت القيف
وقطع سرسار جداول الود
وصنّه يباب ودابك جُد
قبيل وين كت ؟
قبيلك كان يكفِّي رزاز
بعد دا إن جيت
أوديك وين
بعد دا إن جيت
وأنا اتيقنت بدري قبيل
بعد فرّجت فيِّ الليل
ونبّاه الدغش في العين
وأنهكت الوداد بالصد
وأشواقي الغبش بالبين
حليلك كنت زولي أنا
وملاذي الفي السمح والشين
تموت آهاتي لما تبق
متل جهر العديل والزين
خطاي فوق دربك الدردار
تشولت من متين ومتين
مورقت البيوت بالود
نورقت الحصاد كان صد
وكان لابُد حليلي تصد
نان تقعد تناجي الطيف
بلا البيدودي في النيران
وما من خلوة لامن ضيف
مي كم من شتلة فوق القيف
بتيبس وكم حراز في الساب
يخدّر يوم بحيرو يصد
أمش يعدل عليك الله
طريقك لا غلب لا آه
ولا نسمع مريكبك تاه
وسط لجة زمن جهجاه
وأنا الزي الشعوب مغلوب
زمان السخرة والملاك
أنا العبِّيت مخاليْ ريد
وقلت لك يا الحبيِّب هاك
أنا القبِّيت لويبي الإلفة
ألقِّم في جدَيْ محياك
أنا الباسمك ببيت محروس
وبي رسمك بقيت مهووس
أنا الصبّيت مطيرة شوق
رويتك دمّي همِّي ألقاك
ومن تعب القميحي الروس
ومن نخل المودة البوص
لقيت شدر الهوى النديان
مجرد عود وناقرو السوس
وما نوحّتَ قُت "يا ملاك
حرام رحماك أنا البهواك"
ولا حنّيت أزورك يوم
أنا الطول الولِف ساساق
جمعت أشلاي ولملم روحي
من بين ريح زمن فرّاق
وقت يا قلبي رغم الغلبِ
لا انكسرت قليلة الوعد
ولا اندفق وفا العشاق
ولا ضاقت رحابة الكون
ولا غمّاً نتح حرّاق
بحب الناس مشيت مسكون
أنا اليي دا وحبايبي يي ديل
وشيلتي أماني شايلة شيل
وفي إيدي عزاي عصا موساي
فيا ضل الغنا المايل دريبي عديل
أرم موزون
على ناساً غبش بالحيل
بتآكل من وشي ا*****
وتشرب من بواقي السيل
وتنطارش جراح الحال
تحت موّال معطّر فأل
يقطّر من عيون أطفال
بتلفح من هجيره ضليل
يجم جوّاها زي شبّال
يرسِّي الخاطر المغبون
يلولي بنسِّي جوع البال
خلا الماعون ..
تفتِّش في القميرة شليل
شليله المافي تربى رجال
وتمرق في الدروب آمال
تعدل الميل ..
وتركز لي رماح الويل
وراء درق العشم في بكرة
يا بكراها شان ماتكون
ويا بكرانا قدر الكون
بعد الخيل ..
وأشد الحيل ..
وأتكِّن فوق تقانت الليل
شعاعات الغنا الميمون

احمد الاحمدي
01-29-2012, 10:40 AM
قادرة أبسم أو سراب


إنت لي بتقول كلام
والقلب شايف كلام
والحصل منك تمام
خلّى من ريدنا السلام

شمعة الحنية راحت
روحة في جوف الضلام
والطيور على دوحة ناحت
تاني هقِّل ياغمام

وينك آرمل التلاقي
وويني يا بدر التمام
والفقش فاح بالسواقي
مالو بتحتحت تُمام ؟

ماني مَن يرمي الحمالة
وفوق مقاديرو الملام
لا أبرئ النفس ماله
ومال مشاوير الغرام

من قبل يبدا الخصام
كنت عارفاهو الختام
إنت داب نفسك دوام
وقلبي داب في الهم وعام

نفسي أبني البرج عالي
وإنت متواتي الحمام
ساعا لي شح الليالي
ماهو للترف الحرام

ما إصطفيتك لي برايا
لي ولي أهلي القراب
إشتهيتك زول ضرايا
وشفت فيك راجل عقاب

قلتَّ لي خلِّي القراية
والنشوف الفي الكتاب
بيكى أحقق تام منايا
وليكي أحلام الشباب

كيف تبعتك واعمايا
وكيف بريتك يا سراب
وليش حريتك لي سمايا
وإنت نافد يا سحاب ؟!

خاتي أنا الصدَّق رواية
من خيال الإغتراب
يا اللي فاكر الريد غواية
غاب ضميرك واللا عاب

ألف ليلى وليل بلايا
بإنتظارك في ألف باب
وفي شرف بالي البلايا
وألف مرحب ويا حباب

قادرة أبسم في النهاية
صابرة بتخطى الصعاب
عندي ما فيهو الكفاية
من نَفَس تسّب تساب

عيني في عينة هوايا
حبي مدفون في التراب
أروي بي دمعي ودمايا
وماب يشيلو الريح هباب

احمد الاحمدي
01-29-2012, 10:43 AM
شوك الشوق



شوك الشوق لى الشوف آ خَىْ

ضارب فِطن النسج الحى

يا منقاش أحزانى إنشرت

وادى الفرح إتمدد صَى



يا راحلين ــ عِـنْ ــ دُغُش الليل

ما لاقيتو جناياً زى ..

تكية نخل الفجُر الجاسِر

فوق فى المتَرَة .. عَرَاجِنْ ضَى



آ رعاوة .. العرب الرُّحّل

ما لاقاكُنْ فى المطرانى ؟

فى كاويقْ الجرف الأمحل

بين أسراب الرهو الراحِل

ساند أكتاف الليل الميّل

عِنْ ساساق الغيمة عليكُن

بين رقراق الخيمة معاكُن

ما أديتوهو شِوَىْ ... بى حرجل؟



آ رطّانة الليلُن ليّل

ما لاقاكُن فى ونساتكُن؟

بين الشادِى وبين كاساتكُن

فى صلواتكن .. عِنْ دعواتكن

أو .. دقساتكُن عِز خلواتكُن

.. زول .. زول الله

إن مِحِن .. آ .. بِسأل



الهبّاد لى غُلبْ أخواتو

الفرّاح عوّان الحلّىِ

الفدّاع لى الليل ظُلماتو

آ نجمات .. شقيش قولن لى

ما لاقاك طالِع .. متدلّى ؟



المطيوب من طيبة أُمّاتو

كالفجّاج .. الندّ نباتو

موج البحر اللّحَمَر هوجتو

وعِرق العِرِق .. اللاّوى ثباتو

جانا الشَدر الأخَدَر منو

ونار الشدر الأخَدَر جاتو

فات شِقيش ...

أب قولاً واحِد ..

وليش ما يرجع من غُرباتو

طوّل طُول .. ما طلّ علينا

وقاطِع مِننا جواباتو

الغابات جات تنشِد منو

والعربان راجين جياتو

أديناهم عرقو .. وعَلَقو

صورتو يقلِّب فى كِتْباتو

ضُل رشاشو .. ركيزة زولو

ساعة سِلمو .. ويوم حوباتو

سِن طوريتو ولون أبرولو

حِس طنبورو البى نغماتو

لهْلَب عِشق الناس الفقرا

وبرّد جوفُن .. بى غنواتو

... ويا غنواتو

الدخلت فينا

تمرق .. جينا على جِلاّتو

وجِيداً جينا .. طلقنا وشينا

وش الدنيا الليلة حلاتو

وش أطفالنا الليلة حلاتو

وغنى معانا غنانا هويتو

غنِّى العالم

غنى حياتو

لا ساومنا عليها قضيتو

ولا فكينا من إيدنا .. وَصَاتُو

ألف شليل يا نورة يفوتو

عشان ما يجيك شليلك زاتو

احمد الاحمدي
01-29-2012, 10:54 AM
ياتو وطن؟!!!!
الشاعر محمد الحسن سالم حميد

ياتو وطن في الكون الواسع
دون عينيك راح يبقي وطن
وياتو سكن في الدنيا الغنوة
دون عينيك راح يبقي سكن
ياتو شمس راح تشرق تطلع
لو عينيك بادمعة بكن
وقام منديلك.....غازل خدك
غطي عيونك....غصبا عنك
هاج منديلك..اغمي عليهو..وقع من ايدك
ومن الدهشة الفيهو رطن
ياتو وطن؟؟
تعرفي ناس عنتر حبو؟
وليلي وقيس ضاقوها محن ؟
اصل القصة عيونك انتي
كانت نجمة تضوي سماهم
وكانت كل كلمات الالفة مسطرة فيها
كان عاشقين السما والنجمة
عبدو النجمة لانك انتي وانو السما في ذاتا ملابسك
كيرت بيهم احلام حبك
وقام رسموك في كل قصيدة
عيون بتحدد نوع القصة
وقصة تعبر عن تحديدك
كرسي وكنبة ورحلة طلبة
يزورو النيل والموية العزبة
يلاقو النيل كان دمعك انتي
واصل الرحلة..........
دهشة وخلعة يوم عينيك بالدمعة بكن
وقام كنديلك.....غازل خدك
غطي عيونك.....غصبا عنك
هاج منديلك......اغمي عليهو
ومن الدهشة الفيهو رطن
قريش يوم عبدت الله حجار
كان فاقدين لي حنك وعطفك
عبدو اللات والعزة وغيرن
حج وطواف تقديس ووهن
انا سويتك نفس القصة
احلي يمين من احلي وثن
قلت اذوب في حبك راهب
واعبد الله الرسمك جوة
واقفل بعدك محراب حبك
واقعد جوة احبك واعبد..احبك واعبد..احبك واعبد..احبك واعبد..احبك واعبد..احبك واعبد..احبك واعبد..
وارسم دنيا تكون ترنيمك
واصنع دنيا تكون تحديدك
واكتب في عنوان دنيانا
مافي وطن في الكون الواسع
دون عينيك راح يبقي وطن
ومافي سكن في الدنيل الغنوة
دون عينيك راح يبقي سكن

احمد الاحمدي
01-29-2012, 10:58 AM
ما طال في بحرك في مي

وتمرك مفدع بالجريد

شدرك امد حد السمى

طينك معتق بالطمي

نبيتك اكيد نبيتك هوى

نبيتك ايوة سوا ..سوا من جديد .. نبيتك جديد

ايد ابوي على ايد اخوي على ايد انا

على ايد على ايد تجدع بعيد في اللجة في من راس ميضنة

حيكومة الفقر الدمار

الكضبن والصهينة

اللي ناقص ايامنا كاس

اليالطيف سوس البحر نردم قفاهو حجر .. حجر

من ها الرصيف

الما قدر قدام سريحة الموج يقيف

الما انستر الرزقية وناس وايه

نسقيها كاس اسقينا

نوريها كيف عشق الحياة

سنانا فوق حجر القصاص

سوانا ناس ضرب البحر

جوانا احد من الرصاص

يا ضو حبيبين القسا

طول ما انت غرقان في الاسى

تبت يدين ما ترمي ساس

ما تبني مجدك من جديد

تفتح شبابيك الخلاص

تدخل نسيمات النشيد

بيت القصيد يستقبله

مستقبله والحاضر الماضي التليد

يا بلدي يا فردة جناحي التاني

وكت الناس تطيرلي عالمة

وا فجعة الزول البيجيك

ما يلقى فيك غير الهجير ناسا تواي مسالمة

مل البشاشات القبيل تلقاها ميتة مسممة

والجاته جاتة من الارض ما جاته من السما

ما اعتى غبنك يا ولد

واعدل قضيتك واعظمة

لا ترجع السيف الجفير

والدنيا فايرة مصادمة

من غير تجيب تار البلد

ريح العوارض تهزمة

تطرد مع ابليس الاخير دعة الضلال

من جنتك ادمة

تأكل من الشجر الحلال

يغشاك نعاس في ضل رمى

تختال هضاريب الصعب

كربة ليالي المظلمة

يا نيل قبل خاطرك يطيب

ارضك تفزع باللهيب

تكشح تواريب الغضب صعب المراس

نوبة و زنوج وبجة وحلب

رطانة عربان مواشو

ومولدين تلقانا او نلقاك ضو

ظلمة لياليك العجاف

رعشة نهاراتنا النشاف

امنا بيك وموحدين

في ايدينا فاس وقلم رصاص

شتلة وكمنجة ومسطرين

وطبنجة في خط التماس

احمد الاحمدي
01-29-2012, 11:00 AM
كرويات الصبر البيضاء




كرويات الصّبر البيضاء انهزمتْ
ووجمتْ
وخرّ جوادَك ... قبل يقرِّبْ
حمُيّات الغُلُب السّوداء
إنلمّتْ
وضمّتْ
وغَزَتْ أجسادَك .. وبتّ تهضْرِبْ
من هضريبك ومُر تعذيبك ..
بين النخلة ومجرى النسمة
انساقط طاير ...
فَتْفَتْ
حَتْحَتْ
ريشو قُصادَكْ ...
وكان ده حبيبك ... وقُمت تجقلِبْ
بين القيفة وباب النّهر ..
دبيب الرِّيح من دَبَش القهر ..
اتلوّى اتلبّدْ ولَدَغ الشّيمة
الشّيمة انكفتْ ..
البحر انخجّ ..
الزبد انعجّ ..
الطين انحتربْ ..
ومرقت عقربْ
ورفعت شارة ..
اندفعت فارة
تجاه المركبْ
ووقعت سارة على صنقور رواسي قريبك
وقام مِنْوهدِبْ
وكابسو الجندبْ ..
وكان دي امجادك
بين الميضنة والإرصاد
انجرحت غيمة ..
الغيمة الطيبة وحاملة حلالْ
من ألق البسمة الفي الأطفالْ
من عَرَقْ النسمة الفي العُمّالْ
والنّاس الفَالْ
انسرحت فيها شظايا آذان الوقت الواقع
بين تغريبك ... وسرقة زادكْ
مَدّتْ إيدك تالا القبلة ... رشاشها يصيبكْ ..
تسبي نديهتك ..
تفقد جيهتك
تنزف تنسف دانات دعة الهوس الديني
الطيني
الجيني
قوافل اورادكْ
تقضف ..
تركُض تالا جنازك ونعش أولادكْ
باري نحيبك ..
ترجف تتعب ..
تغضب تهتف ..
تلقى قُصادَك سدُّ مرابي
أرزقي ..
رباطة
وكور همباتة ..
لحى ونخاسة ..
وكل السّاسة الباعو نصيبك باستشهادكْ
عاد ان شاء الله تكون الجنة الماهلة ميعادكْ
إلا الحاصل ديل حُسّادكْ
بعضِ يقول الله لا عادكْ
وبعض إن لاقي طريقة يعيدك
تاني عشان الموت يصطادكْ
يا مجلوب في سوق الآخرة ..
ويا متمقلب تحت جهادكْ
خرّ جوادك ..
مات الطاير ..
لدغت شيمة
كرش الغيمة إنبعجت
دمّت ..
عينيك طمّت ..
وغمّ قليبك .. وكان دي بلادكْ
وين مستغرب .. ؟؟؟
تقدر تكسر حمرة عينك ..؟؟
تنكر سيفك ؟؟
تابى جفيرك .. ؟؟
دابك تقوى
يا بني آدم .. تفقد مرة .. مريرة ..
ضميرك تكسب ثروة ..
وتلقى العالم تحت سريرك
تشبع
تروى ..
وترضع ذاتك ..
من لذّاتك ..
وحلو الحلوى
من ما تبلع يوت تتبرع ..
وكلك نخوة ..
صدقة لعمرك .. وباقي حياتك ... ونصر الدعوة
حبّة جوامع ..
صوامع ..
وكوتة
وكوتة
تفوت الفوتة
بأسرع صهوة
عُمرة وحجة ... وتسأل ربّكْ
يقبل توبتك يغفر ذنبكْ
يمسح سفّكْ ..
خيرات شعبكْ ..
اصلها كانت عترة في دربكْ
لما تعبت ... وفاتك حزبكْ
لما ضهبت ...وخانك قلبكْ
كانت هفوة في لحظة سهوة
عن الإنسان والحال الأسوأ
ودابك فُقتَ ..
وجاتك صحوة
وجيتَ تكفّر ..
يا رب تغفر ..
اغفر ..
اغفر
عبدك خاسر شيء ما بيسوى
انت القادر ... إنت الأقوى
يا البتخادع حتى الله .. !!!
وين الشُّهرة .. المال ... والجاه ؟؟؟؟
وين السّطوة ..؟؟
الجّشَع .. ؟؟
القسوة .. ؟؟؟
اركزْ ..
اركِزْ
لا تجيب رَخْوَة
يا مِتلبّك في الأدران ..
الحجر الأسود ما هو البروة
وما ها مكاوى الكعبة تجيها ..
حين ينكَرْفَسْ توب التّقوى
ومافي خُرَط لي الجنّة تودِّي ..
لا في خُطط ممهورة برشوة
والمشروع الديني الخالِصْ ...
ما محتاج لدراسة جدوى
يا من قال يارب من قلبو ..
رد الخالق دائماً أيوة
اركز ..
اركز ..
لا تجيب رخوة
اركض ..
اركض ..
تالا اشجار العملة
واقصِفْ ..
اقصِفْ من اوراقها ..
يمكن تستر عورة شينك ...
وما سواهو زمانك جملة
اركز ..
اقوى ..
ولِفْ بشكيرك فوق الرأس ... النشّف غيرك !!
لا تستهوى ..
قضّي منافعك وتم العُمرة
وفوّر موية زمزم قهوة
اركز .. اركز .. لا تجيب رخوة
ماك غلطان .. !!!
غلطان الشعب الجزّ جراد الغفلة كفاحو
الجنى أرباحو .. ضياع أرواحو
وجيد للحاصد ...
وبخت الحاصد
ماك غلطان !!!
غلطانين الشهداء الراحو ..
الواحد ..
واحد
ماك غلطان !!!!
غلطان الحزب الجمّ سلاحو وخيلو تناهد
ماك غلطان !!!!!
غلطان زمنكْ
واصلاً وطنكْ
ياها جراحو وعندك شاهدْ
رَفْضَك .. سَجَنَكْ ..
شان الكادح
والمتكادح
يلقى صراحو .... ويبرأ السّاعِدْ
تهت لامن تقضف دم ..
وشارعك هازيء ..
يهز اصفاحو .. وبرضو تجاهدْ ؟؟؟
لامن صَقّرْ سن منقارك ....
لامن طايرك قصو جناحو ....
وخرّ يكابدْ
ما حَسّابَكْ ... إلا عذابكْ ..
وليلاً دائماً كارمه صباحو ..
ونجمك ساهدْ
لما بديت تفرز لي عيشتك ..
لاكو عويشتك ..
واجمعوا جملة بأنك تالفْ
وانو سقطت .. مع أنك واقفْ
فوق اسمنت وتحتك عملة
هم ساقطين في البرد الناشف ..
وجاهم زاحف قوز الرملة
الإملاق العيش الشاظف ..
وفي ظلمات الزمن العاصف ...
قاسي عبور اليم ... يا نملة !!
وهسه غلابا الدنيا الكنت بتتعب غنية عشان يرتاحو ..
المنك راحو ..
الكجنو حِنّك ... وعنك أشاحو
ضراعم غادي
عليك يتجارو .. بدون ما تنادي ..
وصاروا نفيرك وقت حصادك .. ورابى نصيبك
هرِّب ..
هرِّب ..
خير بلادك برة وسيبكْ
يا أوعية البلد القطّتْ ..
ما بيسقيك الدم الفاسدْ
ويا أودية الولد الشطّتْ ..
ما بيشفيك اليمّ الراكدْ
إلا الدم البدأ يلقّط ..
واحد ..
واحدْ
إلا اليم أب غيماً نقّط .. وجاييك قاصدْ
يا محبوبة في وضع خريف ..
شالع دجلو ..
وكضباً راعدْ
بيت راكوبة ..
وحوشو صريف ..
سَوّسْ مِرْقو ..
وسقفو يناهدْ
احسن تحت المطرة نقيف ..
بي كفيك ..
كفّي ..
والسّاعدْ
وراسنا ...
نضاري الطفل الواعدْ
لامن يبقى سمانا نضيف ..
من تخويف ..
تسويف ..
من زيف
ونلقى الوطن الحِنْ ..
مو الطاردْ
واللا الموت
الدغري
الواحدْ

احمد الاحمدي
01-29-2012, 11:01 AM
عيوشـة



منبوشة منبوشة
نبشوها قبالك بت حالا زي حالك
زي كلمة مربوشه
عودها إنبعت حرقان زي شتلة معطوشة
عينيها رماشة أم لمبة فتاشة
من طاقة جاتا الريح
كتر البكا التجريح
خلاها دعموشة
تلوشة ولا ضفاف
خيم عليها جفاف
زي صرخة الغرقان فوق موجة بين فيضان
شعراتا منفوشة
وشفع مبارياها عيوشة عيوشة
الليل هديماتا وشمش الله برطوشة
تشرب من الشارع وتاكل من الكوشة
عيوشة عيوشة
وترقص لهن رقبة ، صقرية ، جابودي ، السامبا كاروشة
عيوشة جامايكا الهورس عيوشة اسلولي عيوشة
وعيوشة ما بترقص لكنها الدوشة
وتفلت من الشفع
في الفلتة تترتع
تدخل على بيتاً ستاتو منمدِّي ناساً بعرفوها
لكن بعافوها
دايرين غسيل عدي شاكرين يا دقلوشة
ويدوها عيشايي بي دمعة مرشوشة
وتنملك الشارع خطواتا مربوشة
السوق مع الأطفال عيوشة عيوشة
الليل هديماتا وشمش الله برطوشة
تشرب من الشارع وتاكل من الكوشة
عيوشة عيوشة
على قدر ما كاست عينيها ما لاقت غير مطبقة وبصلة
المطبقة انهردت والبصلة مقروشة
ما قلنا مقشوشة
قشوها قبالك ديشك يا عيوشة
يا الحاضر الغايب في الدنيا ما جايب خبر المدينة الكان
على رغم ما فيها من فاقة من حرمان
مرات اياديها تعطف على الإنسان
بي فكة في قروشا
بي كلمةً طيبة بي فضلة في مطعم او برتكانايتاً ضرباني في كوشة
والليلة بانت زي بيتاً في آخر الحي ناساتو منبوشة
يا جرحنا الهايم طول النهار حايم
يلبد إذا ما شاف صحبانو مكشوشة
يضحك إذا الكومر قبل على كوبر
ولا المديرية ينمطق الفرحة بس فرحة مغشوشة
إن تنجا من كشة دردير وتلتيلة
كيف تنجا من جوعة من بردها وليلا
عزت برنداتا واوكارها مطروشة
بيت الله قافلنو
مستشفى غافرنو ساحاتو مرشوشة
كم يوم يعز النوم
رغماً عن المشموم والدوخة والدوشة
دي مدينة ما هيلك
مافي البيشبهلك ما في البناديلك
لافي البخاويلك
غير ناس أحاويلن قطعن أحاويلك
أصحابك الساعتك لا بد يعاينولك
صمتاً يجيبولك
باكر تلاقيهن في وجبة فوق كوشة
جنب مجرى يحكولك
ودونا لي ضابط كالعادة وانكفرن قال وين أوديهن
والعندي ما قادر بالموية أكفيهن
والعسكر أدونا
سوطين وفكونا
كالعادة يا اخونا حيكومة مربوشة
دايرين شغل مافيش
غير نغسل العربات غير نضرب الاورنيش
عتالة جرسونات شغلاً ما يوكل عيش
وبالحالة دي الكشة
بلدية والبوليس مرات يجيك الديش
ما يقبضوا الباعوض ما يقبضوا الضبـــان والما بدور فتيش
الارزقي السمسار إشمعنى نحنا وليش
إحنا الحرامين ولا البدسو العيش
الزول يخاف يكفر يرجع يقول معليش
شقيش نقع شقيش حتى السجن مافيش
مافيش يا عيوشة
من تكبري آهة وآه
وآدم بدور حواه
الطيرة بي عشوشة
الفارة بي جحارة الكل بي مأواه
وهنا في إبن آدم تاه
ملجاه أرض الله
لا أوضة لا حوشة
يا أبونا يا الأسود
يا أمنا القرقد
يا داجي وين نرقد
جاك المحل قاسيت لامن هجرت البيت
فض المطر صديت
أو صددوك غصب
دارك لقيتا حرب
كرت عليك فريت كان مافي غير تنفد
بي لونك الأسود بي شعرك القرقد
وبي فالك الشامخ زي تاج أبو الهدهد
لامن يطير في الجو من ها المدن ينفد
حاشاك من عيب تب
لي شينة ما ختيت دغري وعراض إيديك
بس كفها إتعود في الأرض يرمي الحب
ما قنبلة وديناميت
جيت المدن لاقيت
من سيدا ما لاقيت
تحرس عماراتو علشان تمسي تبيت
ويتربو زي ما ربيت
كم للعرق شديت
زوغت أمن كريت
جاملت جاراتو
وأو تتم ترحل لي سيد خلاف السيد
يتغيروا الأسياد لكنو نفس القيد
نفس الربط ذاتو
يا ماشي دون راس خيت
وين كنت لما الناس إنقسموا ا*****
في مدن تجز الراس كان زولو ما طاطا
كت مافي ولا أبيت واصبحت مقطوع راس
زي ديل كتير من ناس لا أوضة لا ضل بيت
وفتحنا لاقيناك أول ما شالنا الحيل
بالراحة في ذات ليل
يا أبونا خليناك خففنا ليك الشيل
تقلت بنا الخرتوم
وفرنا لقمة عيش موية ومحل للنوم
سامحنا عافينا يا أصلنا الحنّان
غيرنا اسامينا شان نحيا باطمئنان
دينق إنقلب عثمان هاشم بدل دلدوم
من وين ؟؟
من ام درمان وناس بيتنا منوفين
بس لكنة الرطّان تفضحنا بعض الحين
وإن كنا يوم في يوم ماشين بننعوّد على لهجة الخرتوم
في ولاد عرب بالكوم
طالعين سوا ونازلين يفرقنا إلا النوم
ما الحالة من بعضا مطروش ومطروشة
وأكوان وقد قابل في كوشة عيوشة
يا التحكي دون تبكي وفي وشو بتعاين
شوف فيهو شن باين غير دمعة مقشوشة
قشوها ناس أخوان أكوان وعيوشة
بي صبر كم طول
على حال حا يتحول
قصر الزمان يا زول ولا الزمن طوّل
لا بد يتحول
ما فيهو من آلام في يوم من الأيام لي دنيا مفروشة
بالعافيي والطعام لي كل فم ما دام في غلابة بي ديوشا
وبجاي و بغادي قلة وكتر بوشة
تخمت حكام مندلدلة كروشة
فاوة وتفل لاقّي
ونار الغضب باقّي
تالاها محموشة
جرفت لبقة الليل وانطنبجت دينك لا عينا بي شموشة
الحال حا يتحول قصر الزمان يا زول ولا الزمن طول
لابد من فوقة ومن تنتهي الدوشة
قولاً قبل قلنا وكتين نصر نحيا مافي البكتلنا
قولك يا عيوشة يا اب نفس طماعة غاشاك ومغشوشة
الدنيا دنيانا
زرع إيدنا نديانا لا صيص لا كدموشة
وماك ماشي جيت غاشي ليك خيرها ينسبّل
لا كُتّي شحّادة نديك وتتوكل
لا جيتنا دنّاعة نمسح لك الجردل
أخرت للساعة وتلبت في حوشة
في حزك المنجل وشوالة مخموشة
ناسي انو مزروبة
بي شوق حبايبنا وحارساها كلوبة
وكلوبة بات ووبة ويات لوبة بتحوشة
يا النفسو ماهية
شن جبهة متكية
بي عمة كاكية وطاقية طربوشة
جنب جبهة دغرية العمة مكوية فوق راسها ملوية
ترقش بياض نية وبالهيبة منقوشة
زي وشم فوق أكوان شلخاً في عيوشة
يا جرحنا الطوّل
جاييك زمن طيب خيراتو ليك أول
صدقني يا طيب يا أرض يا جدول
كارتنو بي معول
والليلي تتجول عينيك مدهوشة
من كنت تتسول في مدينة ما هيلك ومن كوشة لي كوشة

احمد الاحمدي
01-29-2012, 11:04 AM
النخله

النخلة في الليل المهول .. وحيدا في عز الرياح
فارس يدارق في الرماح .. الجايا من كل إتجاه
رغم الجراح .. شح إلمي .. الزاد والسلاح
راكز يصول .. لا أنّ ولا حنى للجباه
لا خان بصيرتو الإنتباه
لا حتى قال ديل المغول
لا ختّ آه على عز قديم .. روح عجول
طول مداميك الصبر .. سدابا طاقات النباح
كل ما نزف من جوفو دم .. كل ما عزف لحنو الصباح
نجم الميامين الحمش ..
ينضارى شان تشرق شمش
تدي الحياة .. الناس .. الحقول .. الدابة .. والطير .. والبمش
لكنو ما بخبر أفول .. والأرض مخلاية التعب
مصلاية العشق الصعب .. ما بتستباح
زي نخلة .. في الليل المهول
كانت بتختبر الفصول
كانت بتمتحن الرياح .. كل ما تطول
والدنيا خوف عابر سبيل ..
يشوف عنف الرياح في النخلة .. واللا النخلة في عنف الرياح
في ليل مهول
طوالي راح يحلف يقول .. النخلة ما بترجى الصباح
والطيب الصابر سنين .. راجيها باكر .. حقو راح
لا فكّ دين ..
لا سدّ جوف .. رزقو المعلق في الصبيط .. مشهادو أصبح بين بين
النخلة ما بترجى الصباح .. لكن ضراعاً في البلد عارف عروق النخلة وين
خابر صمودا المن متين .. وسامع مناتقة الرياح ساكت صياح
لكن ضراعاً في البلد عارف عروق النخلة وين
ضامن ثبات ساقا الهطيط
وسامع مناتقة الرياح ساكت صياح
النخلة ما بتقدر تخون الأرض .. ما بتقدر تكون غير المراح
لي همبريب يغشى البيوت .. عند الصباح
نص النهار .. عند المغيب .. عز الرياح
النخلة تتجاسر تصون عش الطيور البينا .. تفرد للجناح
ما ليها غير تطرح تمور .. تملا الشواويل القفاف
ينتمّ زين .. ينحلّ دين .. يطلق ضهر زولاً بسيط ..
واقف على حد الكفاف
ومن ركة الرزق المتاح .. رزقو المعلق في الصبيط ..
ينزل كما الطير الخفاف .. يقدل نشيط ..
يخضرّ زي شتل الضفاف .. كل ما النشاف بدا في الصبيط
والنخلة لو عنف الرياح .. الصاعقة ..
أهوال الفصول .. آفة الذبول .. قدرت على ساقا الهطيط
تقع آ بتموت
تلقاها خشت في البيوت .. بي كل صراح
تبروقة .. سجاجة طهورة .. طبق من العرجون ..
ضنيب هبابة .. قفة وكسكسيكة .. حبل متين فتلوهو في ضل الدليب ..
نشلوبو من بير للشراب .. نسجوبو بنبر وعنقريب
تلقاها خشت في البيوت .. وبي كل صراح
جوبيل جريد يعرش سقف بيتاً جديد
أول دخلتو عريس سعيد
مبسوط يقرقر بانشراح
أو حتى واقوداً تقيدو السمحة في نار بارتياح
لي يوم عزيز ..
يطلع خبيز
نبيذ الليل صفاح
يطلع ملاح .. بروبو ناساتاً ضيوف
ولي زول وراهو شغل بعيد .. جابرا الظروف
يطلع قهيوتو وشاي صباح
وآخر المطاف ..
الموت بيلفح بسمة من توب الزفاف
الموت بيشرق نسمة في كل الصبا
النخلة ترباية العباد .. بي جلالا تنحول رماد
ورمادا ينحول سماد
وسمادا يدخل كم بلاد
وديانا تخضر والبطاح
شوف كيف كفاح النخلة .. شوف كيفن بتتحدى الرياح
تعبر على مر الحياة وتنمطق الموت بي جلد
من بعدما ملت البلد .. شتلاً معمر بالألوف
وشايل مخلف بارتياح
طول المصير .. النخلة حوتة الصحرا .. نوارة الجروف
تلقاها في أجمل وشاح
بي جراحا رجّتنا الصباح .. يا القلتو ما بترجى الصباح
النخلة تحت الأرض سر .. والنخلة فوق نخلة نصاح
والدنيا أوسع ما تكون .. والجو براح
وكل الرياح فوقا بتمر .. يكفيها دا .. ويكفيها صاح
ما استسلمت لي ريح غريب .. وكل الرياح فوقا بتمر ..
والنخلة ما بتخبر خلاف ريح اللقاح
والهمبريب وريح الصلاح
يا معوض الليل بالصباح
يا معود النار اللهيب .. روض نخلنا على الرياح
وفي لجة البحر الغريب .. أدي الرواويس الصلاح
يكفينا دا .. ويكفيها صاح

احمد الاحمدي
01-29-2012, 11:06 AM
حمتو


لا متين يا هم تشرق
الزمان : الساعة سايرة
المكان : فوق أرضو دائرة
حمتو قاعد .. والحدادي الفيها قاعد
من جهنم طايرة
بالحديد الواطة فايرة
والعرق نازل يغرق
راسو مقطوع حيرتو حايرة
فكرو واقف بين يطرِّق
وبين يشيل جالون(زادو) يشرِّق
يمسك المنجل يطرِّق
قلبو ينبر الشاكوش يطربِق دقّو والمنجل ينقنق
حمتو دقّك دق مقلق
في حشاي يوقد يحرِّق
حمتو شرِّق
حمتو شرِّق
حمتو شرِّق
شان تفرِّق
وحمتو مشلول بين يطرِّق
وبين يشيل جالون يشرِّق
داخُل الوسواس يوسوِس
"حمتو منّو وليك تقرِّش
تاني منُّو وليك تفلِّس"
حمتو لا ولدوك مهندس
حمتو لا خلقوك مدرس
لي ثواني الحال بنعوش
وتاني حالاً زين يمغِّس
فيكَ بوم الهم معشعش
ليك سنين في الفوق تحنِّس
تأبى تتغاباك تطرطِش
وهسّه قبّال ما تفلِّس
ولي جريد البؤس تنقرِش
ولامتين للرأس تنكِّس
لامتين ياحمتو شرِّق
عدِّي فرِّق ..
ندِّي ونِّس
حمتو شرِّق
حمتو شرِّق
وحمتو مصلوب بين يطرِّق
وبين يشيل جالون يشرِّق
فكرو مشتت مسرِّح
بالو يتذكر بعيد
ساعتو لامن كان شويفع
كان بيلعب بالحديد
كان بيفرح لمّا أبوهو
يدِّي ردمة من الحديد
بينه يسرح كلُّو يرتع
لاهي مبسوطاً سعيد
ما يهمُّو قميص مرقَّع
ولاَّ برطوشاً جديد
ياما قام زير دمّو نقَّع
وجسمو نبَّق بالحديد
وبرضو يرجع كلُّو يرتع
لاهي مبسوطاً سعيد
من ضواحي اللاوجود
حمتو جا العالم طريد
ماشي بين الناس وحيد
تمرة حايمي بلا جريد
ما حصل مدّت لو إيد
شان تبارك ليهو عيد
ومين يبارك لي بعيد
كل يوم في قيد جديد
هام وقضَّى صباهو صائع
لا صويحب لا نديد
وحمتو مرَّة سأل أبوهو
لمّا شفَّع كاتلوهو
وجعوهو وحندكوهو
يابا وين طينَّا وأرضنا ؟؟
قام أبوهو إنضارى غادي
ورشَّ بي دمعو الحدادي
وحمتو صاقع وين أرضنا ؟
وين دواليبنا وأوضنا
وين أهلنا ووين بلدنا
وليش بعضنا يدوس بعضنا ؟؟؟؟
تاني أبوهو إنضارى غادي
ورشَّ بي دمُّو الحدادي
إنت مالك يابا ساكـِ ..
يي مالك الدقّاك مِنو
قام أبوهو إستغفر الله
وشالُّو ملِّين قالُّو يلاَّ
إشتريبه حلاوة يلاَّ
حمتو راح باع الحلاوة
وفي الدرب حاشوهو شفَّع
ومن قَبُل يصل الحدادي
نوحو كان سبّاق وأسرع
(ورا)خِبر أبوهو سبب بكاهو
من عقاب صوتاً مقطَّع
قام رجالة عشان يحصِّل
لاحظ الخطوات بترجع
لي طويقات غلبو قفَّل
وكفلت القلب الموجع
حائط الأيام تكسَّر
حمتو شبَّا وكلما يكبر
كلما يصغر
والهموم أكوامة تكتَّر
فوق رويحتو وكلما يودر
هم قَبُل ما حمتو ينسر
يلقى تاني التحتو بنقَّر
ثار .. وسلّم لي قسمتو
وبرضو ما سابو المقدر
جاء الخريف في ليلة هذّر
لي كرارق حمتو كسَّر
للعفيش والعدِّي شتت
والحديد الراجي صقَّر
في جنينة سيدي صنقر
تحتو كوم أطفال مقمبر
وأم بترفع في الأيادي
وفي الفراغ الصوت تكسَّر
صمتو سبَّا .. وأهَّا زفَّر
فكرو طلوح فات وبحَّر
في متاهات ماب تُقدَّر
والمطر بيناتو مطَّر
لي كرارِق ذاتو كسَّر
وحمتو حد ما يوم يعاين
للبيوت روق الجنائن
زي لويمبة وسط رتاين
حمتو بس يسكُت يعاين
بس يعاين
بس يعاين
لمّا تسألو يوم عن إسمو
حمتو لي إسمين يملِّي
حمتو ماب يعرف قراية
وحمتو ماب يخبر يصلَّي
إلاَّ بس يعرف يغنِّي
ولي شراب الروح يدلِّي
يطرا لامن ماتت أمُّو
ما اتلقوا أخواته اليحمُّو
ما لقى الإيد التريِّح
لا إتلقوا الناس اليجمو
ما اتلقى الزول اليصيِّح
لا اتلقوا الفقراء اليصلُّو
رغم إنُّو وإنُّو إنُّو ؟؟
ما مقصِّر كلُّو كلُّو
بينو عوعا وبينو صيَّح
دمعو حمَّا ودمعو ريَّح
قلبو صلَّى وقلبو سبَّح
وبينو حلَّ وبينو ينزح
ينزح
ينزح
ينزح
ومرت الأيام درايش
وحمتو محتار كيف هو عايش ؟؟
جاري في الأرزاق يحاوِش
رُبْ وقع بيناته دايش
حمتو مات بين المعايش
حمتو مات مع إنُّو عايش
وما بكت غير الحدادي
مات وماطقَّالو صايح
لا خبيرو طقش رادي
مات وما نعتو الجرائد
لا بقت لو قبير بلادي
مات وسبَّلتو الحدادي
ونعشو شيعتو الأنادي
مات وكت قوق الحمائم
نتَّفو الصقر الرمادي
والجرب صاد البهائم
قاطع الغيث البوادي
لامن النيل بينَّا صقَّر
في الحفائر مويتو صادي
وماشي صدَّا حرِد بلدنا
طاش يلوص ..
كايسلو وادي
مات وكت ماتت مثلنا
واقعي لاحيله وتنادي
ولمّا صوت الرب تكسَّر
والقيم باتت قلادي
مات مع الإنسان وسطنا
ويوم صِبِح عالمنا مادِّي
ولامن الصلاَّي تبول
في قفا الجامع عبادي
عاش وما عاش إعتيادي
مات وما مات إعتيادي
وحمتو في الآخرة ويعاين
للبيوت روق الجنائن
وحمتو حد ما يوم يعاين
للبيوت روق الجنائن
زي لويمبة (لهيبة) وسط رتاين
حمتو بس يسكُت يعاين
بس يعاين.

احمد الاحمدي
01-29-2012, 11:07 AM
نفسي أقدّم لك جميل

نفسي أقدّم لك جميل
وفي حدود الإستطاعة
فليكن هذا الجميل
غنوة بين الناس مشاعة
ولاّ سرية وتقاوم
في الجمود .. حمّى المياعة
المهل ضيقا النبيل
شان بلد تاخد وساعه

غنوة قالت يستحيل
يصبح الأسف البديل
للتماسك والتواصي
بي مشي الدرب العديل
راح تموت البركة بركة
واللي نيل راح يحيا نيل

ويا عروق السنبلاية
الأرض ما قط خيرة
لسَّه يا بيوضة جايي
ألفِ غيمة وألفِ غيره
لا تزال القبلي طايي
والأرض باشة عشيره

خابرتني نسيمة شافت
طيرة خالت لي شديرة
من الشديرات التلبِّد
كلمة السر في صديره

والعصافير ماب تكضِّب
لاب تحوم فوقا الإشاعة
قالت النار إندلاعه
في المساخر حار قراعه
و لابد الدنيا وضِياعه
عنوة ترجع لي جياعه

وينطلق ضهر التواريخ
المعبية سيرة .. سيرة
تجي الطراوة ..
تجي المطيرة
تجي النقاوة
تجي الدميرة
بحر غنانا من الحجيرة
يغرِّق الذمم العضيرة

وللتقدم بي هداوة
التلاميذ البي خيره
بي ضراوة
تدق براوة ..
وبي شقاوة
تسوّي قيرة
للمطيرة المافي غيره
راتي ياخد لي خبيره

تحكي عن عزة مهيرة
رزتا وهزة ضراعه
نفرته الولد المظفَّر
وكيف سفه دنياه ومتاعه
في سبيل سودانو قطّر
دمّو سطر فكرو واعي
سرُّو كان في اللهُ أكبر
ونفسِ شورتا بي جماعة

نفسي أقدِّم لك جميل
فليكن هذا الجميل
حكوة عن عبد الفضيل
التماسَك وما تداعى
ولاّ عن عبد اللطيف
ورحلة المنفى الشجاعة

سنَّ حنجرتو الخليل
بينو بين حجر الجداعة
وكان مسبب من قبيل
وانتفض فارس رفاعة

شلتَ من جودة الرماد
وقمت مورقت الزراعة
بتَّقت كل البلاد
بي ولاد طول باله باعه

شهداك الهيلا قاموا
وبوغوا التاريخ جداعة
توروني وراحوا ناموا
في حِضن سيد الوداعة
اللي ما خان الوداعة

حملوني أمانة أغنِّي
معجزاتك بي براعة
ولا أبالي تكنِّي جنِّي
ماهُن أدُّوني الشجاعة

يا برية متل جناياً
مستمِخ حصة رضاعة
أو شقية متل غناياً
سرُّو يدِّينا المناعة
ضد مناحات التسول
والتوسل والضراعة

أيوا أحبِّك لا شكية
لا حراق روح لا إلتياعه
ذهني قادر بيك يفكِّر
إيدي قابضي على يراعه
لي ضراع أخضر يخدِّر
وكفِّي فالح في الصناعة

في بحار الحق مراكبك
ليْ صلاح يعجب شراعه
فيِّ سِر نهمة مواكبك
دون جرائد وهوشة إذاعة

ويات مطر بتشاور الريح
والبوادي دغت مجاعة
يات سيولاً ترجى تصريح
ولاّ تصديق لإندفاعه

ماب أبدل فيك وأساوم
لاني تاجر لاك بضاعة
شعبِ غلباوي ومقاوم
وأمّة ما أنبل طباعه

قول ونسمع لي كلامك
يا وطن سمعاً وطاعة
قلبي ضاق بالغنية حامك
ورؤيا زيّك في وساعه

نفسي أشهد من غرامك
آخر آهاتك وداعه
وتشرق الدنيا السلامك
بينا يتبختر شعاعه

لو أغنّيك عمري أجاهد
وإستلف من ميتِّي ساعة
ماب أوفّيك دا أنا واحد
وإنتَ أمجادك جماعة

احمد الاحمدي
01-29-2012, 11:11 AM
طعم الدروس


وريني شن طعم الدروس مادام بكانا مشى قطر

وكيف ذاتا ترتاح النفوس تقبل قرايتاً فى سفر

يايمه حان الإمتحان من وقتو بس فاضل شهر

ما اظنى من جور الزمان انجح واجيب ليكم نمر

كيف ذاتى يا نبع الحنان انجح من آلام السهر

عمرك سمعتيلك جبان خاض المعارك وانتصر

زينوبة كل ما افتح كتاب القاك فى أول سطر

القى الجداول والصحاب القى الجناين والتمر

فى الحصة عقلى أنا قام سدر يمه المدرس لو فكر

كان بلقى قاعد فوق ككر فى الدونكي لسع ما فطر

يسمع كليمة يا عشاي وأغلى الحكم عند الضجر

أنا قلبى كلو عليك جناى وقلب جناى على حجر

والله موش لو كان نهر لو كالنى بسيطان بقر

مادام عقيل الجن سدر ما اظنو من عندك حضر

بذاتو ابوى تلقاهو قام فاتح كتابو مع الفجر

يقرأ ويرتل فى كلام ما بفهمو الناس الكفر

زينوبة كر من حالى كر قاعد لى فوق نيران جمر

غربة وكمان حالاً فقر عذبنى قبل أصل القبر

الشوق متل شوك الكتر طعن الجسم لمن خدر

والله لو ما بنقبل ما كان بفارقك بى شبر

زينوبة دنيا الإغتراب خلتنى زي ورق الشدر

اتحت من عدم الشراب عم الأراضى وانتشر

الغربة اصلو طعيمها مر لكنى بقعد بالجبر

لمن سنين الهم تمر يا ربى الهمنى الصبر

احمد الاحمدي
01-29-2012, 11:14 AM
مصابيح السماء التامن طشيش

(2)

وبي تأني
تمشي تفتح للدروب
المارقة منك وداخلة مني
المارقة منك وداخلة في
الداخلة فيك ومارقة مني
من بعد دا ولا يهم
المغني مع قضيتو
يقضوا أيام في القسم
كلما تنبح كلاب كلما انكشح العذاب
كلما طفح السباب كلما عانى الجسم
كلما غروه سم
كلما كان المغني كالمعاني يبتسم
على التجني ... كانوا جني
شديد بصيرة وملتزم
سديد بصيرة وملتزم
ويا المغني الماندم
يوجد غنوتو وينعدم
خاتم المغنين يا ختم
يا مصطفى الصلاة والسلام
الحب عليك يبراك وسم
يكسيك هدم ... يكفيك اسم
النخلة طالت ..
والسبيقة بعد دا لي شنو؟ التنهدم
قول للبلاد
الطلوحت عينيها في دمع السواد
قول ليها ما غنى الأسف تتأسفي
لا حض نمو على الحداد تتكتفي
عاد عودو ما ودع شهيد
البال دوام في شهيد جديد
لأيام جداد لما العوالم تكتفي
وينهض جوادها المنكفي
ذات مرة ما عرف السأم
لما البلاد صادها الوخم
صارا المبغض دغما النغم
في سجنو يتطرطق ألم
ينسف مطاميس الوهم
بي سن قلم
كل القواميس الوهم
جافا المداد
لما الأماسي بقن رماد
خرم الزمن بي غادي قاد
وإندق في الخازوق سهم
دودر نويرات الفريق
قربن بعد كانن بعاد
كورك لنا وما كنا في :
- وين السيوف ؟!
في السوق أخدنابا السطل
هايصين كتر والخيل حفي
كورك لنا :
قبل المصابيح تنطفي وينزل سواد
اتفقدوا الخيل والعتاد
اتمنعوا الدرب العديل
أتصحو بالصبر الجميل
زمن الخساسات الخفي
ينزالف الشوق في الرقاد
قدح المواعيد ينكفي
في الضلمة برد الليل مخيف
قاسي احتمالوا على الضعيف
قاسي احتمالوا مع التعب والجوع شديد
فطن النويرات الرغيف
فطن الرغيفات الدفي
فطن الدفي إحساس الصباح
فطن الصباح كل العصافير تحتفي
وبي روعة الكون والعباد
كورك صداهو أعاد وأعاد
في أي درويش إترسم
عن نقرة النوبة العرق
في كتفو اكبر من شتم
أو قوقي حمامة مخرفي
فوق البيوت الجايطة دم
كورك براهو وكنا في
صانين وراهو كما الغيوم
بس كل غيمة مطرفي
على قدر ما اتحزم يلم
بالدنيا تصحى مخرفي
يجي ريح يسوق غيمو الململم ويختفي
غلبو التعب ... كوع على جرحو اليسار
سكت ... سكت كل الكمنجات اتكت
فوقو وبكت
أنشودة النزف الوفي
أغرودة أو زغرودة الموت الخفي
فيا من تحير في سرو الفنا
إذا الهاربين الجدد خيروك
يا تفوت يا تخون البيوت
تكون من أنا؟!
إذا الغالبين في أحد أجبروك
يا تموت يا تعضي السكوت
فكيف الغنا ؟!
وكت ما الشفوت بصوتك تصوط
تعلق بكارتو على الميضنة
تحرم عليك ملاقاة طيوفك
مناجاة ولوفك ... وراء المشجنة
تغمض تشوفك
تفتش حروفك
تعبر كلامك
تعد احتلامك بباكر زنا
فنم لا تهم
لأن السلطنة
ترصد الألسنة
نم لا تهم
لآن السلطنة
تقشر الألسنة
يسري قول الشعوب في المسام دندنة
مش بسد المطر والهبوب
الدروب الخبوب والخنا
وما بتعوز البشر من طرق ممكنة
يبقى يا حاكمين
كلمة العالمين مافي من يلكنا
و(لا ما بتنكتم
فنم لا تهم
زمن ماهو هو
قوانين شذوذ حتى في الأزمنة
وطن يا جنا
وطن قول وطن
وطن من تبن
ولا قمحة هنا
وطن ... ثم من ؟!
وطن ... ثم من ؟!
وطن ... ثم من ؟!
وطن لا تمن باعك الزنزنة
وطن واحتمل
وطن وأحتلم
بي رجع الحبيب من متاه الضنا
في ناسا عزاز مشتهنك رزاز
في ناسا رزاز مشتهينك هنا
يحيض الحراز حين يفيض البحر
عشان يزدهر طول فصول السنة
هو الضد يكون
سكون في الغضب
غضب في السكون
هو المستقيم ... هو المستدير
هو اللولبي ... هو المنحنى
هي الكائنات في الطيور مسكنة
وتستخف بالصقور حين تفقع جنا
فهم وأدلهم عليك الصدام
عليك الكلام الجديد الحديد
عليك السلام يا شهيد الغنا
تموت ما بتفوت ...تفوت ما بتموت
تموت أو تفوت الشفوت العنا
ويظل الوطن سيد الأمكنة
ويظل نبع المياه والضو
قمحنا ...كسانا...عافية ...سكن
وين ما نسكتك نسمع ....
عصيفير الحكاوي رطن
متين ما نفقدك نلقاك تحانن بالغناوي وطن
مع إنو حباك ميتة الغربة ...
واستكتر عليك كفن
قدر وطنك مع الأوطان
إذا ما كان سحايبو أبن
يمرقن قش من الوديان
عشان تلقى الغلابة لبن
قدر وطنك إذا ما كان
قبل يقسى ويخيب ظن
حبيبو الطيب الإنسان
يطفر روحو روح الفن
وطن لكنو مو هولك
ولا الزول القبيل بي خيرو بات زولك
وطن محتل بشوق مختل
رؤى ووجدان
ينوم والجنة في خاطرو
يقوم مبتل
بنات الحور وما أدراك ما الغلمان
فما قولك في شافع ضال ومايل ميل
قيام ... والشيخ ورع باللحيل
بعد هانة ...نصايص الليل في زنزانة
على أمشاطك كما الزانة
أقيف حتى الفجر طولك
فما قولك في مولانا
بعد وردية الشافع
دخلبو في خانة وسخانة
وكجن .... غنالو مكتولك
وما معنى الأرض بالضبط أو بالربط
حين تكدح تكد حولك
تجيب الموية بالسرقة
غرامة ودردرة وعلقة
ويصادر الوالي محصولك
وطن ... لكنو مو هولك
وطن ما ليك فيهو وطن
مجرد واطة لمت ناس
لا علم لا غيرة لا إحساس
دلق منتوف من أي كفن
مصبغ ظن
وطن ... لكنو مو هولك
عموم الحلة والأحباب
غريب أصبح عليها زمن
عليهو أغراب قلوب وسخن
يسوطو هوس عذاب ومحن
ولكنك تغني وطن
بعد ده وطن؟!
عشان ما تفتح الأبواب
فيا دخلة هبيب الرحمة
يا رجع الحبيب إذن
تغني ... تغني ما أتيقن
يكون بعد المناحة الضيق
زغاريد الفرح طقن
فيا من يوت تغني وطن
تطمن في المرق وحيدو
لا خوفا عليك لا حزن
هل يعني النهاية الموت
ويتبعزق غناك سدى ؟!
أملنا الغيم حا يتسابق
على الأرض العزيزة فدى
وطنا حبيبنا رغم البيك هي الأشواق
حنينا إليك يظل دفاق
خيالنا عليك دوام ساساق
يخلي البينا بين عينيك
مساحة غزيرة ماها فراق
فما هانت علاقة حب
وفاء وتاريخ على الإطلاق
وما طال المطر بيصب
طبيعي إنو البحر ما راق
كما إنو العكار من طين
كمان من طين بيجي الرواق
صحيح إنو المطر ضايق
لكن التراب مشتاق
إذا ما العشق مندافع
كذلك حضرة العشاق
وطن علام ... وطن ساكت
وطن ما فيهو أي كلام
وطن آخر ... وطن قدام
وطن ماهل ... وطن قوام
مدد للفي البعيد لحاق
وطن نضام ... وطن ساكت
وطن ما فيهو أي كلام
وطن آخر ... وطن قدام
وطن ماهل ... وطن قوام
مدد للفي البعيد لحاق
نظل في حبلك الواحد
حبيبين ما في بينا فراق
مع إنك ما في بس لابد توافي
وتصدق الأشواق ...لا زنزانة تتلقانا
لا جبخانة لا أطواق ...بلد وأحضانا تتلقانا
جنة جدولها الرقراق
بنطلق همبريب الشوق
على لفح النوى الحراق
بنتعود لهيب الشمس
ما كوش من الرقراق
يا وطن الأراضي البكرة
يا وطن السماء البراق
من كناك وما خناك
وما فينا الضلالي العاق
وأنت المالي عيونا معزة
وين متراوح سايب عزة
ودابا أشتغلت فينا الغنية
دابو ضمير الدنيا أهتز
وبدا لي الكدح الكونو يتبن
شوقا يضوق للعالم لذة
وين متراوح وين
يا طالي باب النيل بحنين الوزة
وعمرك كلو تغني عليها
وتترجاها تعالي ... تعالي
أول ما هي بدت عينيها
استعجلت مشيت طوالي
كوركنالك ... يا الله
سبعة أيام في سبعة ليالي
رجع الصوت النازف آه
سرسار جدول داخرو العالي
كنا غلابة وليل وربابة
متلمين فوق قوز ونغني
قلنا : الصحراء تبتق غابة
حلم قريب ما هو تمني
تنسف فجأة القوز دبابة
وفينا غنانا يصن فد صني
اتجمعت سحابة سحابة
وبدا يتلقط طير الجنة
نفس الريح الحرق الغابة
قطم فرحك ليل الحني
رغم بهاظك وعظمة فقدك
إلا إنو الحياة ما وقفت
إلا أنو في ناس بيغنو

احمد الاحمدي
01-29-2012, 11:15 AM
حوش الربيع


يا مبيتانى الليل قوي
ورجياني أجيب ليك الشمس
طالقنى فيك عكس الهوي وسابقانى
بى فسراع .. وامش
نقرشتى قلبى عشان يكون
يوم مهرجان سعفك .. برش أنا ما انقدت
حب العيون لا من يحاجينى الرمش
ساعالى ناموس الشجون
وحامانى بى غنواتى اهش
مابين مرايات الظنون
فيك كل مرة
بلاقى وش
بقبقتى بى ريح السراب
فانوس رؤاى والشوق عطش
وصقعالى بى داك السحاب بار البروق
وأوعاك تطش
ولا همسة يا بنية الغمام
الرش واديك مندهش
ليش لا قبض شت الغرام
طيروا فيك سوالو عش
نوبة المجاذيب اترخت
ودرويشي ينقز مندرش
وانا روحى تقابة بخت ليها الله
لى رب العرش
فى الضلمة لسه بنات نعش
يابنية بارى العنقريب
ضارب العريجي مجرد غش
فى سكة الشوق الخبيب
إندهدهت راجى الهواء
وعود التباشير يملأ طيب
ينفخ مزامير الهوى
وعلى نقرة العشق الرهيب
تصدح معانينا السوي
وتسكت زنازين الوجيب
وانا بيكى ببقى الكون ندى
وكل المواسم همبريب
لا ريدة تتحترب صدا لا ظن
حبيب فى حبيب يخيب
العمر بالبسمة إبتدأ والصرخة
ما صرخة نحيب
صرخة اريحية ورضا
وأنا راضى بي ذكراك نصيب
يا بنية ما اكتر من بشر فى خير وشر
يختى ويصيب
يسعدنى اكونك من مطر
ما شرط طينك يستجيب
المهدى وين المنتظر عز الكدر
غير فى الحبيب
دي الكتمة
وكشر المطر
حوش الربيع الهمبريب

احمد الاحمدي
01-29-2012, 11:16 AM
بيروت رِبَاة بارُود


حبّت تمُوت
بيروت !
..
تحرَق ..
حراق الصوت !
..
تغرَق ..
غراق الحوت !
..
زي طائر
الفينيق
المامناسبَ الموت !!
على كيفه
حرّة تموت !؟
..
أصلاً رباة بارود
من دون
بَرُود
وحَنُوط
زي لَمبَة الحانًوت
مِتعَوِداهُو ..
الموت !!؟
..
شان آخِر العنقود !
والأُولَى
في البنُّوت !
دون المُدُن
بيروت
الموت مَدَلِّعه
مُوت !!
مدِّيلَه سبعة
حيوت !
يوما التموت ..
هُو يموت !!
..
يا بِت
عليكي سلام
جيّاش وما مشروط
أحلامنا
تبقى أحلام
وبأوهامه
تمشي زلوط !!
..
مافي الوتر
ده كلام
فارغ ..
ملانا سكوت
عبَّ المطر
نسّام
راس الشدر منكوت
..
تلقاني أنا الإنسان
بتشهَّى دايماً
يُوت
جيَّة زمن حنّان
ومالي نفِس
في الموت !!
..
سارجَ الهواء
المجَّان
على كيفي
وين ما أفوت ؟!
..
بالفيِّي من وجدان
جاسر
على الجبروت
قادر
على الطغيان
والطاغية
والطاغُوت ؟
..
كم مَرَّة
يا لبنان !!
تابوت
وراء تابوت !؟
ومنُّو .. وجديد ..
غليان !!
تنزِل من الملكوت ؟
..
يا أرضة
نحنا حجار
جرَّبنا كم مارُوت
يلقانا ..
ما يحتار
ذات الغلَب هاروت ؟؟!
...
هدِّمنا ..
يا طيّار
ما تخلِّي فوقنا
بيوت
عَدِِّمنا ..
نفّاخ نار ,,
أطفالنا سُوطُن
سُوط
تلقى الدفنتُو
بِِذار
تِحتَ الدم
المحتُوت
..
أوَّل تجي
الأمطار
من حلمنا
المبعُوت
حالاًّ تضج
الدار
والطير يغالِط
صوت
أطفالَه
والأزهار
قاشرة
وتلوِّح يُوت
..
الإيد دوَم
في الإيد
والاِبتسامة تفُوت
يوماتي
عربون عيد
بالأمنيات مغمُوت !
..
من تاني يا حقَّار
بالله
قَبلِ تفوت
دفِّق عجاج النار
صُب ما تَصُب
من موت
وما فيكَا من جبروت
دُوس الحشا
بالبُوت ؟!
..
بس كلّو كلُّو
يفوت
ومِن معصَم البنُّوت
تمرُق
كما الياقوت
منُّو .. وجديد
بيروت !!
..
هادي الفضا
المحروت
بالطائرات
الموت
يملِنُّو بالزغروت
برق المطر
هط سوط !
..
..
الليلة لِيل
والليل
غير الزمان
وقِبيل .؟!
ديل الأبَت
ما تشيل ..
غِيرُن ..
ضهُور الخيل !؟
..
حُرّاس ..
وكيف فرّاس
يتحدُّوا ...
مُرَّ الويل ؟
رأساً ..
مارون الراس
قدماً ...
لِبِنتِ جبيل ؟!
..
..
*ولدي ..
الدرب دا طويل
دايرَ النَفَس
بالحيل
..
خبِّر جمال الشيل
من خطوَة ..
يبدَا الميل
..
قصَبَة مدالقَ السيل
قطعاً ..
خدارَه تقيل
,,
راس الجبل
مُو نخيل
وين ريحُو مال
هُو يميل
..
فُوت اليجيك
في فتيل
للبين رياضو أصيل
..
فَزَع الأخي
مُو دخيل
والماطراكَ .. بخيل !!
..
سِحرَ العيون ..الريل
وين ,,؟
يوم دماها تسيل ..؟
..
دمعاً قبيلة
هميل
ما جففُو المنديل !؟
..
خل الوراك
لله
وابرَى الدرِب
دا عديل
يا جِِبتَ حَد
للآه
يا رُح فداكَ
كتيل
...
- شكراً ..
يا ابويا جزيل
شكراً ..
لإسرائيل !!
وأمريكا أمَّ الويل ؟!
...
ظنَّت –تعالى-
الله..
سوّاها عزرائيل !!
لابُد تشيل الآهـ
وما طفَّفت من كيل !
...
شكراً ..
لكلِّ عميل !
مِنَّ الفرات
للنيل ؟؟!
..
ديل علَّمُوني
أشيل
حِملي المخيف
وتقيل
وحداني
فوق كتفي
دام كتفَ أخيِّي
شلِيل !!
..
عُذراً ..
كتير لبنان
صبراً
على التنكيل
..
فِعلاً
هي الأحزان
تمِن إنِّك
أبقى جميل !؟
..
سيِّد ديموقراطي
قِدّامي دُغرِي
عدِيل
حاضِر على الآتي
والماضي أصلُو أصيل
..
يا أروع الأوطان
يا مَن
تكيل العين
بهجة وجمال فتّان
"قانا"
أفرَعِك من وين ..؟!
ولاَّ أفزعِك
بي مين ؟؟!
"يا صيدا"
والغزلان × فتنتك
× أتنين
..
لبنان ؟
سُمُو الفنّان
عُرفُو ؟!
وتراثُو .؟. ودين ؟!
أنهار ..!؟
وطير ..؟! وجنان !؟
غلمانَه ؟!!
حُورَه العين !؟
ساحل .. ؟!
سهول .؟. وديان .؟
رملُو ..؟!
وجبالو .؟. وطين ؟
وما فوقو
من إنسان ..!!؟
..
بيساوي === جنديين !!؟؟
..
أم أنَّ هادي النار
هادي الدمار
الشين ؟؟
هادي الزفار
الحار
مِن أجلِ جِنذيين !! ؟
..
يا خُبثِ ذاك الفأر
جاب التراب
مِن وين ؟!
كُل الشَب المدرار
ما رَوَّقك ...
يا طين ؟!
..
لا أشتُم العربان
والواقِفِين
بِين ..بِين !!؟
..
فليمدَحه الخُذلان
وعار الفِرَج
لا وين !؟
..
عالَم بيتفرّج
على دم يلُك العين
وآخر بيتحرّج ..
الله ..
ده عالَم وين ؟؟!
.
$ جيش مصر
يحمي مصر !!؟
علَى مصر لا تثرِيب
بس عَن وطن
في الأسر
- يا حُزني ..
يعني غريب ..؟
أم يعني
مَن في القصر
مَا يحمي تلاّبيب ؟!
..
شرفان فتَح دكّان
العين على
الفي الجيب ؟!
ما ليهُو بالأوطان
غير كم تُرابَه
يجيب !؟
..
مِنتلِّح الأديان
بالعيب
تغطِّي العِيب
غط عورة السلطان
تكشِفلُو
ما في الغيب !!؟؟
..
من نار
دخانَه ... لسان
غضَب النبي
الغلِّيب !
..
$ درب السلامة
قريب !
..
* درب السلامة
نسيب
فاضي الكلام
ما يجيب
بهماً
جَرابًو الضِيب
..
ضيباً ..
في واشنطون
وآخر
في تلابيب
تالت تِحِت قانون
قانون دمار ..
تخريب
روعة نظام الكون
يرتَع وسطنا
قريب !؟
..
دايرين حياتنا
تكون
حُرقة ونواح
ونحيب
..
لكن ..
وربَّ الكون
هادي الضلامة
تخيب
الروح فُراقَه
يهون
شان عزّتك يا حبيب
..
يا دُخري تربَى
بدون
خبزِ الغريب
وحليب
الأرزقي المأفون
بأعشابه
"شَبعَا" نطيب ,,.؟
..
دا وطن ..
وأنا المفتون
بي أهلُو ..
سهلُو ,, خصيب
أمسِك عليك
العُون
أنا هُون
طَلعبي ... نصيب ؟
..
بين المعزَّة مصُون
يا بوي
في أحَنَّ قِلِيب
..
من لحمَنا
المحرُوق
..
من دمَّنا
المدلوق
..
من رِحمَنا ..
المسروق
..
مِن حِلمَنا ..
المشنوق
..
مِن قلبَنا
المطفوق
بي حبّنا
المذنوق
لي شعبنا
المدقوق
بيناتُو كَم خاذوق
..
من جوفَنا ,,
المشرُوق
,,
من صفَّنا ,,
المشقوق
..
شدَر الوطَن ..
مَخَلُوق
دايماً ..
يطُول لا فُوق
..
ويا فُوق ..
رعُود وبروق
أنزِل ..
مطَر ..
ما يرُوق
إلاّ ان يرُوق
الشوق
بأنبَل
وأعزَّ شروق
..
وتطلَع فجُر
لبنان
مِن عضمك
المسلوق
..
المجدِ للإنسان
والكون
دا ما مطلوق
؟..؟
لبنان
يظَل لبنان
رُغمَ القَهَر
..
يا ..
عِلـــوق ؟؟
..
الدم
سُقا الأوطان
وللقادمين مارُوق

احمد الاحمدي
01-29-2012, 11:20 AM
عروس الطين


بيني وبين النهر ضحايا وكمّين قتلة ونصّابين
وقدر الغيم اللمّا سمايا .... شالوا الريح وبي حُمرة عين
حبل البئر ودلوها منتّف ... وحارستنها دابيين
ريقي دقيق والخطوِ مكتّف ما بين كهنة وربّاطين
وانا ناذرلك كان أسقيك وترجعي طيبة عروس الطين
ويرجع عصب العشم الفيك ... وزي ما كان من قبل سنين
يا ترقوة الحلم الزانك ما أقواك على السكّين
لما غِشَاكِ الصيف الحارق حتحتيهو الصفق الأصفرْ
والنوّار اليا دوب مارِق علمتيهو تمام ينضرضرْ
فرعك عز الزمن الزانق عاهد ليفك وابى من يكبْر
عشان ما يبقى حُراب ومشانق واللاّ مطارق في ايد العسكرْ
وشان الساق الناجرو الخالق ساترو لحاهو يفضل أخضرْ
روّضتيها جذورك ترحل تالا الموية التحت الأرضْ
وفوق الزمن الريحي الأمحل كيف تتشايل وتسند بعضْ
ما كان عرضِك الا الطُّول .. لا كان طولِك غير العرضْ
وين بالساهلة يفرِّط زولِك واللاّ يفوت المال والعِرْضْ
قال طيراً نفد بي حِنّو ... لى جملة عَقابو يغنوا :
يا أكباد الرفاق لا تئنو
طرِّقوا لى المناقير سِنّو
شن طعم العرق والدم واحنا عوجنا ما عدلنو
هِبّن آ طيور من جم .... رخمتين فوق صقر كتلنو
حلماً زانو ليك كابوس ... وراجنبو الليالي يصِنّو
والوعد المشتت روس ..... وكاويق شن بترجن منو
وما بتنغشّن ... حاشا وحاشا
وما بتنكسرن أي والله وما بتنزلّن لي حباية ودود معقود في شبك الباشا
وكم هبّرتن شركو وطِرتَن لي قندولكِن في الحواشة
وقلتِن شارق فجراً حارق وكل الوخم الزيف يتلاشى
تنفض طيبة غبارا العالق وتقبض نسمة خير ودعاشة
وبيني وبين النهر ضحايا وكمين قتلة ونصابين
وكل الغيم اللمّا سمايا .. شالو الريح وبي حمرة عين

احمد الاحمدي
01-29-2012, 11:21 AM
بين الموجة والخزان حلم إنسان


هردت لهاتي بالغنوات ... وقُتْ يبرد حشاك يا امي
ومن التعب البلا صالح .. تفيقي .. تروقي ... تنجمِّي
تسوي مكانسك المطرة .. تضوي البيت وتنحمي
تمرقي صبوحة للجيران ... قدح فوق ايد وفي ايد أَلمْي
يلاقوك شُفّع الكُتّاب نُضاف وظُراف بلا النّسْمي
ويغنولِك ... يغنّولِك غناوي السّابْ
وفي بيّوضة مافي سراب
جبال كَجَبي وفيافي الكاب ... تميد بالخضرة منقسمي
ولا غابار .. ولا هو سحاب .. وتنهجمي
من الدّهشة وتحاحيهُن ... غناكُن نيي ... غُنا الوهمي
ويهتفوا زي كلاب الحي .. على الأغراب
حوافي الصّي وبيوضة
البراسيم فيها مفروضة
خدارا يراري شوف عيني على الأبوابْ
قماريها وحواريها وطواريها بقت روضة .. بقت تشرب من الحامدابْ
تشربي عافيي من إيديّ ... تدوي اليوية بي حشمي
تسوّي السّي وتبتسمي
تشوفي رهاب بُعُد نجمي
واشوفو قريب قُرُب نضمي
اشوف العالم التحتاني .. هيلا هوب وقف ناهضْ
دكّ عمايد الفوقاني ... جوه الُّجب رمى العارضْ
وفي السابو الدمار أفراق عريق الحب نبض قابضْ
متل قبض الحروف في اسمي
غناوينا القبيل رقراق علينا تصب برد قارضْ
أَلُكْ طيناتا من دمّي .. وارمِّلها من عصب عشاق ..
أنط تُلُّبْ واجيك عارضْ
واجر نمي
أدودي لهاتي بالغنوات ... عقب يبرد حشاك يا امي
تسوي السي وتبتسمي
تسمِّي الشعب وتعتصمي
بحبل الشعب تتفرق ظلمةً فيها تتحرق .. صُرُمةً قالوا ليك قسمي
أدودي لهاتي بالغنوات عقب يبرد حشاك يا امي
تقلبي الكلمة بي الكلمي
ضراعك يرمي ما يدمي
تقيفي بعيد عن الشمات تكوني اقرب لي من اسمي
واضمك بارتياح يا امي
أحبك صاح وصاح حلمي
ولاكي سعية للضباح ولا شمش الصباح حزمي
ولا كتف السلاح سواح ولا نزف الجراح ألمي
هيا انحزمي .. هيا انخلقي .. هيا انعتقي ..
متين مو دايرة ري تسقي
ولا في إيد النزيف نبقى ... ولا في إيد الخريف تبقي
ولا الفيضان يبضِّع بِكْ .... ولا في القيفة تنهدمي
ولا ان جات حاره تنهزمي
ولا يغشى الغلب قلبك ولا تشقي
ولا انت تخافي لا تدمي
ضراعك يرمي ما يدمي
فيا حزن البلد عوك كَرْ
ويا سعد الولد ضَرْ ضَرْ ... مع النسمي
ولي قيمة العمل عمي .. وافتحي ظلمتك للضي
سِنِّي على النضال إيدي
سوِّكي بالهتاف فمي
شوارعك لي دويها علي
اذا ما اخر العلاج الكي ... مراويدك حمر صمي
مراويدك حمر يا امي
بليلتي ولا ضبايح طي
قليلتي ولا كُتُر سّمي
وطني ولا ملي بطني
سكاتي ولا الكلام الني
سلام يا امي .. سلام يا امي .. سلام لا هكمي لا دكمي

احمد الاحمدي
01-29-2012, 11:22 AM
حجر الدغش


ياابابيل الصمود
الحجر وعاد من جديد
ارمي يا امي الولود
ارمي لي اخر شهيد
الحجر في المرة دي اقوى
اقوى من عرق القصيد
وكلو من شريانا بروا
ويربى بي دمو الوريد
واحنا سميناهو يسوى
ويسوا بالحجر الوحيد
برضو سميناهو يسوا
طاقي لي بكرة ويزيد
وأصلو باكر ما بعيد
يا ابابيل الصمود
تكمل الطلقات ولكن
الحجر ما عندو سيد
تلقى في كل الاماكن
رامي شاشاي النشيد
والخرابات المساكن
ابطال الحديد (.. )
ما فتر من صبرو داكن
ذاهد النفس وزهيد
لا يكلف غير مواطن فوق ارادة ومدة ايد
من بعد في التربة ساكن تقدحو الغضبة ويقيد
الصهاينة او اليهود طالما اتحدو السلام
طالما اتعدوا الحدود بي ظلامية نظام
استساغ الاقصى هسة ونفسو في البيت الحرام
يا صلاح الدين في لسة عافيي منك لا يضام
أي فلسطين ما ها قصة ننسى عزها بالكلام
وان نسينا منو البينسى مهبط الرسل الكرام
ياحجر يادغري ياحجر يافقري سدًا
في وش الرمال (..)
ياجدع يا دغري مجدًا عالي فوق العالي عال
الورود في الفجر ندّن والعصافير كرنفال
بس ربيع الدنيا دندن لحنو من عصب الرجال
ياحجر ياوطني جدًا مابخونك لومحال
كان لي فيك من بدري مسكن ياتواريب الجبال
ياماكم دفيتلي مجدًا وحضرة الصيد الحلال
وهسي عائد كلي عودًا بيك حميدًا خب تعال
بيني والزيتونة وعدًا يشهد الله لا يزال
المراكب بدري عدّن يارياح الاحتلال
الصمود اداني جلدًا اعلى قدرة على النضال
ولي حجر دايمًا مدوزن بكرامن غضب الرجال
واصلو باكر ما بعيد طالما تحتي الحجارة
طالما في الجسم ايد طالما في الجوف جسارة
وبطن ما خلى من شهيد رابحة ما خسرت تجارة
حين بنوك الدم رصيد
تالت الحرمين يا اقصى رابعم ياحجر عنيد
يانروحي الجنة هسة يايجينا وطن جديد
باقصى من سرعة حجر (.. ) مدردح حر عنيد
ياحجر وحدّنا فرّق بين حناجرنا النشيد
كلما نحفر نغرّق لاتحت معناك يزيد
حجر الدغش
في ايد الغبش
ياحجر نجيض
ارميك في نهري
يقوم يفيض
ارميك في نار
النار حمت
لهبا العريض
(يبرق بريق)
نطّق لسانا وغمغمت
هل من بصيراتًا عمت
هل من تتار هل من مغول
مذ انظمة (روس) الاسى و(عِقل) العقول
هل من فِقِر نفض شرايين المطر قبل النزول
شرقت متَر حرقت حقول واول ظهر في الجو
حجر بت الرسول
انكممت كل الفصول باطفال معبية بالنشيد
وعلى الحجارة تيممت صلت شديد لوطن اكيد
من نوع جديد آن الافول حان الرحول
يا مترفين بان الوعيد فارت جهنم دمدمت
نارًا حمت هل من يهود تُرب السلام
هل من عرب تَرَب الكلام هل من مجيب
هتف المدى حتى المحيط عطف الصدى وكما نريد
وانا يارسول الله نشيط رُغم التعب
ودمي المراق ، نورك على ضهر البراق
(راجف شهيد )
غضبان غضب وفي الارض طفلة مدى الفراغ
تصرخ غراااااق يرجع صداها الباكي غاااااق
تزهج تعيد تمخر شديد في دجلة يلفحا للبعيد
تندهلو( ننشايل) قريب
ناس بيتنا عازمنك حليب
بي بسكويت يافا وخبيز امي اللذيذ
وانا يا عزيز مشوار بسيط
ونسة وحديث
فول بي تميس
اغشاك معاك جيب الكتاب
لاتقول نسيت وضروي كلم ناس ابوك ناس امك
انك راح تبيت
وبكرة الصباح برجع معاك نجي عن صلاة الجمعة
في فوج الحجيج .. يلا اتفقنا ؟
من المحيط والى الخليج ومن العراق حتى الفراغ
بينا اتفاق يا الدرة غاب يا درًا يغيب
والطفلة تغرق في المحيط ومن الخليج حتى الخليل
الطفلة تشرق بالنشيد
يالدرة عووووووووود
عود يا حبيب عود في الضجيج
واصوات رفاقتك زي طيور خطفا الصقور في ليل غريق
فصلك كئيب .. كل الفصول والريح بهيج
بالغم يهيج كرسيك على المافيش قعد داخ وارتعد
قال في نحيب يالدرة دااول يوم تغيب بسبب وجيه
قلدن دفاترك لي بعض
درًا نبيه وروح ما بتروج درة العجيب
في درجو مرهم وشاش جروح كان نيتو يتخرج طبيب
لكين عوارض الدنيا والقسمة النصيب
الخيبت كل الحظوظ الا الرصاصة ابت تخيب
يابوي تماسك لاتخاف الحين بجي الاسعاف وآطيب
لكنو آه لا البلد آهـ لا العرب لا المسلمين
لا بكرة لا الاسعاف قريب
يا الدرة والعالم غريب لا يشيل خبرنا ولا يجيب
قسمتنا نحنا ولاد عرب
حتى العرب قسمة ونصيب
يا درتي الغالية يالبيك فال ولدي
رفع الجباه عالية دلابا غيم جلّدي
روى مهجتي الخالية علّم ضلام خلَدي
لا ارض اعيش جالية او لايجة في بلدي
كفى يا غريب دا الدرة يرجع ذات وطن
زي درة لما يغيب بجيب
لا ينكسر طول الابد خاطر البلد لابد يطيب
بالحاجبو يحتجب الهلال وبالجنبو (..) الصليب
درة وبجي من يا لطيف بي امتك
حس البنيي كما انهتك سقف السما
وكتر رعود
يالدرة عوووووووووووووووووووود
هاك بسمتك فكيتا من فك الجنود
ساعة لقيتا ورا الهرب يالدرة زي كل اليهود
بالضبط زي بعض الجبب مشغولة بي عد النقود
وانا خاتيي حجرين زي نهود تهتز قندولين قصب طول بي كعب
عالي الكعب ( حرقت ) خطاي من غضب زي الطرب
هي والجنود غرقانة في الدم للركب
بالضبط زي بعض الجبب ظنتني بياعة هوى
فَتَحت خشوما كمن عوى فتحت خشوما كمن غوى
فوق كفة ايدك كم حجر فوقم هوى فكيتا منها فوووووووو
هوااااا ...... ياالبسمة عاين درتك
في دمي (....) سوا
وفوق حتتك غزيتو عود غزيتو بي دمعي اتروى
وفتح ورود قبل الربيع انا وانت راجينك نعود من جتتك
يالدرة عوود عدي الحدود مات من مطر مات من رعود
مات نسمة شن حرس الحدود بالله عوود
من بكرة م نماضي الجدود من حاضر الوطن الولود
بالله زي ماك ياكا عووددرة الودود
مليان حياة..... يادرة سمعنا النشيد
حفظني سورة الانبيا
كتبني في دفتر جديد
دفتر وهيط
الصفحة بارقي من الخليج
والغضبة باقة ورا المحيط
اعربني :
هل هذا الحجر سيدكُ انظمة الزجاج
أم انّ كل خروجنا بالارضِ قافلة احتجاج
يا درة علمني الدواس
انا قادرة .. ما يكفي الحماس
يادرة ما تنفي الطقوس
دا عدو وعبيط .. الحرب تحتاج الخيول
ايّ انهمي (هبط الهطيط ) اي افهمي (ر.. ) النحاس
القومتو من فجرك نشيط غضبًا منو البيوقفو
الشافو حارو يوصفّو قلنا السلام استقرفو
والكل كلامنا استنزفو لا عيد مبارك لا عفو
خليك كما الزيتونة حاد حولك لصوص البوص تلوص
لا تعود العين النعاس
سولك من الليمونة فاس لي راحة ايديك الغبش
حجر الدغش دانسب مقاس
مادام في ناس من دمنا
ويالدرة فو..دسو الرصاص يا الدرة فو
ود عمنا الواحد نفو والتاني ناس في الصحر فو
كايسلو تار من دار اخو طالب القصاص يا الدرة فو
يالدرة فو شان طلقة جلت مرفعين
بين السعن و ناشتلو راس صاد الطيوور اتسالخو
الكاس سخو والراس رخو
(والباقي ناس اتشالخو )
يا الدرة خو بالله علمني الدواس
يالله علمني الدواس
ياولا دا الزمن الحجر
راح والله مات ميت السقوط
يأجوج وماجوج القنوط
(الأمركة وزل (الشعور
يا الدرة يا حجر الحجر
اكرم من اي سلام سجر حربًا تخوض كل الخطوط
من بنكنوت لاحلام زلوط
مادام في ناس دسو الرصاص
يالادرة علمني الدواس
ابراني زي قلم الرصاص
مش (... ) دا وخلاص
خبربي هذا الانتكاس
الا الحجر دقر الكجر
أقصّر طريقة الى الخلاص
ياوعد صادق يا وعيد
يا امة نلدك من جديد
يا إما فوق دم النفاس
السبة والصرخات غضب حتى الخلاص
يا الدرة هبّ ..وانت التهبّ
إنك ذهب ..للنار لهبّ
كم جمروك من العرب
كم يضفروك على شهب
كم(تم ) من بنات المسلمين والشعب شعب من اللهب
اشحد هناامرض انا اشحت هنا امرض انا
اضرب ولا شغل الُبنا
على ارض في مستوطنة
اشحت هنا ، امرض انا
اضرب ولا شغل الُبنا على ارضي في مستوطنة
الله المدبر يا بلد والله الغني
وعالمبنا
وانا يا رسول نشيط رُغم التعب
يا كل خلاصة بت وهب يا من صبرت على اليهود
وما استحملوك بعض العرب
ياال ليك رب
خزلوك اسيادك (رباش
نصروك ضعاف كل العهود
وفي كل بلدة من البلود
في جنود أمية وابي لهب
يامستميت قابض على جمرك تقيد
حارس قضيتك يا جدع يا جنا على اعداك غتيت
شاهد)شارك على ضهرالنشيد
رادف وراك كمين شهيد والدم شطيط
نقّط نقيط بالله شدة مت سعيد زي التقول بخة مطر
لي عجوة من انجج سبيط شربا التراب ما من لقيط
سكرت (ولاد)بلاد الخير حلال والدنيا عيد
يالله ما احلى الوطن لامن يكون انساني
انساني زي صدر الرسول ماهل وهيط
والدرة يلمع من بعيد زي عقد في جيد بت يتيمة
على العرب والمسلمين على كل بال انسان امين
تقرا وتعيد صوتا البسيط المستشيط (فن ) وغضب
واشواط خليط ف فا فلسطين دا درر انسان بسيط
وا وطن ماهل وهيط حا حجر حتى المحيط
ارض تمرق من جديد جنة للاطفال وعيد
وهنا
يا رسول الله تقول
تقول سامعك تقول
وينك يا زول علّك شديد
حتى انت من طينك طريد
حتى انت بي دينك شريد
حتى انت عن وطنك بعيد
أي لا اله الا الالة الله وآه
إنسانك آهـ اطيانك آهـ
أديانك آهـ(...آهـ ) و
الاقصى آه صفا يا حجر وطن انتباه
تحت الحجر نبع المياه
كل ايد في ايد والقدس قدس الله وبس
في الارض ما في بلاهو سيد من بين
سماحتك يا الرسول ودم الشهيد والطفلة
(.....)
سلام ومرق نشيد مسكون
..... )
مدفون على حجر الغبش
لوطن جديد في زمن شديد
يامن تراني ولا اراك
هي الحجارة كما تريد
وهي الجسارة ولن تحيد
زمني اللي لي
الما علي
وطني البريدك منو لي
وطني البيمرق من حشاي
مع الله لي
وطني البهدهدو فوق يدي
وطني البوسدو من حنان صدري
وبغطي بضي عيني وطني الصبي
وطني الابوي أمي وأخي
يا الما بسويلك بي قفاي
يا المابفوتك بي وشي
دمي البحرسو من الصقور
لحمي البحاحيلو الحدي
نغمي البلاهو ولا طيور
صدحت ولا طمبر نقي
وطني البموت وبخلي حي
وطني العريض الحاني
الحاني زي صدر الرسول
وطني اليفيض إنساني زي حضن البتول
وطني النقيض لي بعض انظمة الافول
وطني الخجول بالعافيي في الزمن المريض
كل ال(... ) سودا ونواي النخل بيض
كل العروق خدرا وحبال الود وريد
(ماهيتو )
مو حمرا وسماحة الزول شهيد
وطني وكفى وبلا المعادي الحر
ولا شاطر على قيد انكفى
وطني البغني علن بحبو بلا خفا
وطني العديل الفجري والعامل وفا
معقول تسمو وطن حفا
ما شيد الطاغوت جدرات من جفا
وطني الوطن كفني وكفا
يامبدي بي فجر المسيح مختوم بنشر المصطفى
يامن تراني ولا اراك
واقرب لي من حبل الوريد
وطني او الحجر الاكيد
وطني
وطني
وطني


يابابيل الصمود
الحجر وعاد من جديد
ارمي يا امي الولود
ارمي لي اخر شهيد
الحجر في المرة دي اقوى
اقوى من عرق القصيد
وكلو من شريانا بروا
ويربى بي دمو الوريد
واحنا سميناهو يسوى
ويسوا بالحجر الوحيد
برضو سميناهو يسوا
طاقي لي بكرة ويزيد
وأصلو باكر ما بعيد
يا ابابيل الصمود
تكمل الطلقات ولكن
الحجر ما عندو سيد
تلقى في كل الاماكن
رامي شاشاي النشيد
والخرابات المساكن
ابطال الحديد (.. )
ما فتر من صبرو داكن
ذاهد النفس وزهيد
لا يكلف غير مواطن فوق ارادة ومدة ايد
من بعد في التربة ساكن تقدحو الغضبة ويقيد
الصهاينة او اليهود طالما اتحدو السلام
طالما اتعدوا الحدود بي ظلامية نظام
استساغ الاقصى هسة ونفسو في البيت الحرام
يا صلاح الدين في لسة عافيي منك لا يضام
أي فلسطين ما ها قصة ننسى عزها بالكلام
وان نسينا منو البينسى مهبط الرسل الكرام
ياحجر يادغري ياحجر يافقري سدًا
في وش الرمال (..)

احمد الاحمدي
01-29-2012, 11:25 AM
سلامات يا أحنَّ الناس


سلام ما سلموا العبّاد أواخر الليل قليبن حاس
سلام والفيها شن بوفيها وإنت حجابي والوسواس
سلام ما خشَّ خيط النور على إبر النهار ومقاس
مشاعر قلبي عند زرزور يلاوي الريح بلا أنفاس
يلم الصور يسوِّي قصور وما من خرطة ما من ساس
يسايسوا الريح ، يساومو صريح ، مع إنو جريح ،وما ينساس
سلامات يا أحنّ الناس
ما قهى القمر مبهور مع الوز النزل رقاص
وبين الصفقة والطنبور جزيرة غزيرة بالإحساس
بلدنا متور ومو عتمور أرضنا قريرة مو حصحاص
إذا إنسقت القلوب البور يشب شدر الولف ميّاس
ياالجرف البعد عشرو ودبش وكرو وشدير الفاس
نزل بحرو الطلق ضهرو ، وفتق ظهروا الحلو الأنفاس
سلامات يا أحنّ الناس ..يا درة ، قانقوليس ، أناناس
سلام والغربة لافي مدر فكر تحراها لاب تنقاس
قدر والفيهو ما كسناهو وين بعد الوطن بنكاس
يا حاحاي مسور الغير مسورنا الطير عليها كباس
سمانا شتا وهجير مطِّير بحرنا يحيِّر الغتاس
إن قلت النخل في نوري جنة يقوقي فوقه دباس
وإن جيت للسهل باللوري تسري ليالي لا آخر كاس
خيرنا كتير وكان بيطير دي عين والله ما هو يباس
إحنا أسياده وإحنا بخير ،،، ولا تقولي الزمن عاكاس
تمرنا ولا حلاوة الغير فقرنا ولا غنا الإفلاس
دلقاً بالعرق ينبلَّى يلبك في الضهر والراس
ضارب في الشمش ينقلَّى أرفع هامة وأحلى لباس
ولا بدّ الشبك تنحلّى يوم الناس تقوم هي الناس
والينعلَّى ماب يندلَّى لا ننذلّه لا ننداس
يا رسن الأمل عنْتِلِّي ساب الحلي ركب الباص
وين يلقى الأهل والخلِّي لو لمَّ الدهب والماس
يا عنتلي كان ودناس
كان سواي وموحداث لي ضهر الحبيب حرَّاس
ولي أتر البغيب قصَّاص تقلتو تخفف البكيات
تتقل خفتو الأعراس
نفير للقلي وحدو نفير لمينة بيت مرق رصَّاص
كان عنتلي ، علِّي آناس
وكت ضحكةْ سترتو بكت
سكت منو وليه كان ونَّاس
صحينا مع الدغش ذات يوم تبنا رقابنا ما من راس
حطب حتى الكلام ده حطب ،، حطب والحاطبو داسْ الفاس
تعب حتى السكات دا تعب 0000 تعب والتاعبو حاس الساس
يا عنتلِّي بير الحلي صد للحلي يابسي يباس
ويتلفت تميره تملِّي ماك واعد الصبر بي راس
روقي عيوني لا تنبلي بالدمع 00 الدمع منقاص
لي صبراً حبيبة فضلِّي ،درَّابة وبحر تنماص
صلِّي على البلد بعد الله .. صلُّوا على الحبيب آناس
سلام لامن نلم يا خلة في الحلي الحنيني خلاص
عليها سلام سلام وسلام .. سلام عَد فيها من أجناس
بلد ما فيها أيِّ كلام بلد بالصح بلد بت ناس
إذا ما أذَّن الآذان .00. إذا ما رنت الأجراس
سلامات يا أحن الناس
سلام لامن عشم في الشوق يلمنا نحنا ياك وخلاس
بلدنا متور ومو عتمور أرضنا قريرة مو حصحاص
إذا إنسقت القلوب البور يشب شدر الولف ميّاس
ياالجرف البعد عشرو ودبش وكرو وشدير الفاس
نزل بحرو الطلق ضهرو ، وفتق ظهروا الحلو الأنفاس
سلامات يا أحنّ الناس000يا أبنوسة قانقوليس , أناناس
سلام والغربة لافي مدر فكر تحراها لاب تنقاس
قدر والفيهو ما كسناهو وين بعد الوطن بنكاس
يا حاحاي مسور الغير مسورنا الطير عليها كباس

احمد الاحمدي
01-29-2012, 11:37 AM
تفاصيل ما حدث
سكتّ .. نضم غُناي .. ورّاك ..
بدابك باتّكالي عليكْ
خَتَمْ بِكْ .. بي هروبي إليكْ
وكيف طفّرت صقر الآفة .. ما يلفح جناياً ليكْ
ولا يدخل مجال عشاً .. نسجتِ حنانو فوق إيديكْ
وكيف كوترت ريح الآهة .. ما يقرب فرح عينيكْ
وراء جبل الصّبر .. فضّيتو
والمطر الِحرِد .. رضّيتو
سُقتو على البلد ورّيتو .. ما لمّابا .. لمّا بياّ ... لمّا بيكْ
هادي الحفرة .. كانت بير .. وكان متكابي فوقها حراز
وتحتو الصخرة كانت حوض .. وكانت للقبيلي ملاذ
كانت ملتقى العُربان .. وكانت مُتّكا الِحبّانْ
ومركز دورة الإنسان
مِنّها هبّت الفرسان .. وعندها ربّت العرسان
وكم شِهدت غرام وغرام
وحِفضت كم كلام وكلام
تعكّر حين خصام وملام
تروّق حين وئام وسلام
تراشق أعين الأطفال .. تراهق للعصافير يوت
ترشرش لي تياب بنوت
جنّها من أعزّ بيوت
لا رفعت عليهن سوط .. ولا رفعهن عليها الصّوتْ
حين تملا القِرَبْ .. تِنْمَنّى .. تدّها صَنّة ... حتى تفوتْ
تسوِّي الصّجْ .. تَلِمْ الطّورْ
مديح الحج .. غُنا الطّمبورْ
تقوم تحتجْ .. تقيف طابورْ
هنا الشُّفع .. يمينك دورْ
هنا المارشات .. هنا الدّستورْ
هنا اللِّبّيشْ .. تدور وتدورْ
قريش يا قريش .. حبابا قريش
نزل مَلْك الحَبَشْ والدّيشْ
تدور وتدور .. قواها تخور
تلم أنفاسا زي عصفور
تِنَفّضْ ... تمش بالدور
بشيش وبشيش .. تشاقق بين تقانت العيش
وبرسيماً .. سمح مفروض
وما تهبش دوابا قشيش
بِنيّات الغُبُش شقيش
تودّي تجيب .. مع الدّوبيت
تِنْضَكّرْ خِدِمْة البيت .. مشى الواقود .. في كل عصير
لُقا المريود .. بدور بِدّيرْ
من الأخّير.. تخاف وتخاف .. تخُب السّير
عشان في كلام وراهو كتير
عشان باكر تعود وبخير
عويش في عويش
بنالو عشيش
حِدَيْ وجناهو ربّى الرِّيشْ
جناحو هبيش .. تملِّي ينيشْ
طفش قُمرِينا طار شقّيشْ
مطر يا خير .. مطر
ورا طرف الُحقاب كان روض .. وكان بيناتو خاوي غديرْ
كل الصحراء كانت غابة .... بي شُدرا الكتير وغزيرْ
صباح وهجير .. يهبهب ناز ..
حلاتا وفرفرات الطير .... وقت يغشاها مرة رذاذْ
قطيع غزلان .. نعام وأسود .. وروض وورود دليبن رازْ
مَترَْ مد البصر جنّات ..
خُدر رباها تور الساقية .. حرقت حين جاء بابور جازْ
دغيش في دغيش
حصدنا العيش
طلعنا مطالبين الخيش
والبتشوفو من أطلال .. دي كانت ذات وطن حَلاّلْ
بيوت ناساً كُرام وعُزاز ..
سوا سوا في رخا واملاق
منطقوا لوعة الإخفاق ..
قدر ما ظنّو في الجايين .. تمطّقو روعة الإنجازْ
حويش في حويش .. سكنّا الدّيشْ
أوضنا بقت نقاط تفتيشْ
هادي المملكة المحروقة .. كانت جيهة
وكنا نجيها
مستشفانا .. كم كفانا .. منو نطيب ويتوفانا
كانت نادي ... كانت ورشة .. بوسطة ألّتنا
كانت مدرسة وقبلتنا
لي حِلّتنا كانت سُوقا
لا وقعت صواقع فوقا
لا غضب الله شلّ عروقا
ما من حرب قامت فيها .. لا سقطن قنابل وغازْ
كريش في كريش .. سِعِرْ درويش
دوانا علمنا بات مافيش
كُنّا وكُنّا .. ياما عُزازْ
ولحظات التلاقى لُذاذْ
هِلِكْنا وكت وِكِرْ تورنا .. ودهتنا بصيرة الإنقاذْ
هويتنا إتلغت فينا .. بقينا اعجازْ
زمن خاوي وحقيقتو مجازْ
بشيش في بشيش غلبنا نعيش
قبض والي البلد بقشيش
في الزول الخرب لي بيتو
غالطني المطر .... هَدّيتو
لاواني الفراغ .... لاويتو
وكان أقوى الفراغ ما لاي
شَهّدتَ البرق .. مَضّيتو
نشّن قوس قزح ... تالاي
اندرقتّ باللاّشيء .. وبالمافي اتحويت في قفاي
وقعتَ وراي .. رفعني يقين .. وَقَفْ فوق راي
بأنو الحال مغير زين .. مغير كان قِصِرْ كان طالْ
وإنو الأرض للكادحين ... ومفتاح الحياة العُمّالْ
رَكَزْتَ على غناوي الفال ..
لساني سنين .. وحاضر بال
فنّا لي التعب .. موّالْ
شهرت على المناحة غُناي
فزع صبر الغلابة معاي
وكت ناديتو
كيد الكايدين رديتو
خاواني المطر .. خاويتو
فوق ضهر الهوا .. الشدّيتو
سقتو من الخراب .. وديتو
لي تالا العمار منصاب
فما كان العمار قدامو .. غير قَلَبَاتْ حلمنا الخابْ
طشّ ضباب .. رهاب ورهاب .. شال نفسو المطر .. ختاهو زي ممكون
خَنَسْ .. لحظة خنس قُتْ مات .. رفس تَوّر بخاراً باظْ
رطن بي كل لغات الكون .. وبوّخ .. دوّخ الألفاظْ
كيفن كان .. وكيف حا يكون .. تافقني الغُلُب حين قالْ :
(هربتو ونمتو .. قمتو اعجاز
إنورطتو يوم فرطتو في ماريل بنية الماظْ
ترباة عِزّها التاريخ .. ضراع الكُدّح الأفذاذ
حبيبة جملة الشهداء .. الصِّح الإعجاز)
قال قولو المطر .. وانعدّ فوقي بخار
ركضت وراهو حتى النار
وانترتعت بين التار وبين الشارع الما ثار
وسدّ قصاد عيوني شعار
رافعاتنو في إصرار .. نقابات الهوى الأشجار
بنات الواطة والأنهار
خيوط العنكبوت .. وحمامة خَبّو الصاحبين في الغار
رافعاتنو حتى الشوق وقع من فوق ... وجاهِن تار
صرخت .. فركت للأشجار
في الأنهار نفخت النار بالهواء .. يا جماعة الغار ..
اعصروا على بعض ساريتنا لا تنهار
نشد الحيل .. نعد الخيل .. نسن الصارم البَتّارْ
وكلها كمّها الربّاطة .. بي لُقاطا واحنا كتارْ
صفاً واحداً كالنيل .. وقلباً حارْ
نضاري الواطة بالضرعات .. من الزمن الكركي الضّارْ
وهاكُن شتِّتُوني بِذارْ
صرخت .. صرخت .. حتى النار
كشحت على الطناش مسدار
أجابني الصّي .. وأبو التي تي .. كلاب رمل الهجير الحارْ
وبديت احتارْ
انا نمل المهل قد ضاق .. أم ارضة وجربت حُجّارْ
بديت احتار .. وقام فيني الجرح تاوارْ
رجعت نزفت .. صابني دوار
قضفت حشاي .. جرت بطني .. ووقعت جنازْ
تحت صوت الصنين الراز
بقيت بين الأرض والغيم .. والدم الجمد والغازْ
مطفح زي هتاف مهزوم .. مطلوح طوف نجاتو الضيم
جبدت جنازتي للحجرة ..و وقدتها نارْ
لمحت وراء دخانا غبار خيول كاكية تنخابت ..
يكون من تاني دفتردارْ
طريت تاريخي في لحظة .. نسيت ما طريت ..
وفي طيف بيت دُمى واصنام
تكلت جبيني تالا السام
جعرت شديد .. وبي ساسوية ... فكيت راسي من قدام
لقيتو ضلام
لقيت ذاكرتي معطوبة ومعضّي كلام
مفوتة في انفلاتة سلام
صدى الأيام معمّاها
خواخي الكتمة غاماها
خيوت النسمة مشطوبة
خطوط النسمة مشطوبة .. ومداراها حطام
خفت من انفصام .. قوام قفلت دماغي واستلقيت على طوبة
ورجالة غفيت
نجيت من سهد كمين عام باعجوبة ..
غشاني منام
في أول دفرة في الأحلام
حلمت .. جمعت في راس خيط .. أمان وسلام
حلمت صحيت
وطن منضوم بلا حظرِ وطواريء تحوم
أتَكْرِن بالخبر لفيت .. شوارع المدهشة الخرطوم
نطحت من الفرح للطابية .. طرت دموم
فَتْ .. فتّحت وانشلوحت .. عِن جفلة حمار النوم
على الحصحاص .. شهق بي احساس
حماس في كل جيهة حماس
وما من راس فجيعة الناس
وانا الراس الفجيعتو الناس
نخجت براي .. بكيت وبكيت
بُكاي قلب الغضب تبكيتْ
انلفتّ غادي وجاي
تبنت أساي
في الوضع الحطب
لا فاس معاي لا قشة من كبريت
ولا من يرفع الأنقاض .. يثبت بي لمينة القُدرة مِرْقْ البيت
تفاديت الصنين الفاض .. وِكِرْ في دوشة الديناميت
نتقت خطاي .. تجاهي جريتْ
جريت قدام .. لقيت ساقيني دون أقدام
رجعت أمام .. بركت حبيتْ
وفي حجرة غناي الغاض .. وحلت جريتْ
جبدت ايديني في اصرار .. تجيني كُدُر بلا كفين
اتحسست للما فيّ ... شكيت إني حيّ .. ما حيّ
شكيت إني جيت ما جيت وكيف ومتين .. ورايح وين
رقص وسواسى واللاّوازْ
رقص في سخف ... باستفزازْ
على النيل التمطّى جنازْ
رقص بالسونكي والسكين .. وسوط الدين
صرخت معاذ .. ندهت معاذ
معاذك يا وطن .. يا فازْ
جناك منّك .. عليك وملاذْ
خطاوي الكفت إيدا جوازْ
مكثت صراع ترابلة وطين
أقاوم في الغبينة سنين
ولا قدميني لاالكفين ... ومقطوع راسْ
لا نوبة وزنوج وحجازْ
لا بجة لا كُتُر طيبين .. ولا عُكّازي لا حجازْ
ولا زال المطر في سماهو في طور الدعاش ورذاذْ
قرضت عمر غُنايا لقيتو ... باقي فرد وتر مشدود .. ضحكت حزين
أنا المسدود في فتح مبين
وأنا الفاتح سدى الجايين
شفقت على الشُّدر في حين
عِرِق فالوا اطمئن .. تحين تباشير الصباح ويبين
بعد ما نموت .. بعد ما نشيخ
أبيت حتمية التاريخ
بلا عرقاً يخدر ودم
وانا الباغتني ريح الغم
وابيت انغم
وصادَنِّي الجراح الجم
وابين إنجم
ما بضّعت .. لا ساومت فيك مين كان
تعبت من المطر خليتو
ما بين البيوت الطين .. وما بين التضوي قزازْ
يرايي ويبدي .. وين ينحازْ
ولى يات جيهة يبقى حبيب
ولى يات جيهة يبقى حزازْ
غرست انفاسي في الزيفة .. الخريفا بجيك
معطر بي لهث شفتيكْ
خمشت من الدعاش لونو وهرعت إليكْ
لقيت كبد البلد مقشور .. وغامدة عينيكْ
دخلتك بي مسام الرعشة .. من فرقات اصابع ايديكْ
مَرَقْ بِكْ .. وفُتّ بِكْ .. تالاك .. مضبلن والمطر جا عليكْ
أتيرب في أوج العينة .. تربال التوحّدو فيكْ
إرادة وقدرة الإنسان وقد يبقى انبعاثو وشيكْ